ខេត្តព្រះសីហនុ ៖ តាមប្រភពពត័មានបានឲ្យដឹងថាលោក ទុំ ណូ ប្រធានសាខាគយខេត្តព្រះសីហនុ បានប្រាប់មន្ត្រីរបស់ខ្លួនពីការជះទឹកលុយទៅឲ្យលោក គុណ ញឹម អគ្គនាយកគយរាប់ម៉ឺនដុល្លារ ដើម្បីបានឡើងកាន់តំណែងជាប្រធានសាខាគយខេត្តព្រះសីហនុ នៅពេលដែលខ្លួនមានរឿងអាស្រូវពុករលួយព័ទ្ធជុំវិញខ្លួននៅខេត្តប៉ៃលិន ដែលទង្វើរនេះគឺផ្ទុយពីឆន្ទៈរបស់រាជរដ្ឋាភិបាលកាលដែលបានចេញសេចក្កីសម្រេចបង្កើតក្រុមការងារថ្នាក់ជាតិទទួលខុសត្រូវ ដោយរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងថ្នាក់ខេត្តទទួលខុសត្រូវដោយចៅហ្វាយខេត្ត ដើម្បីធ្វើការទប់ស្កាត់បង្ក្រាបបទល្មើសគេចពន្ធ និងជំរុញការប្រមូលពន្ធគយឲ្យបានកាន់តែប្រសើរឡើង កាលពីថ្ងៃទី៩ ខែតុលា ឆ្នាំ២០១៦។
ក្រុមមន្ត្រីស្ថាប័នពាក់ព័ន្ធដែលឈរជើងនៅក្រុងព្រះសីហនុដែរនោះបានបង្ហើបឲ្យដឹងនិងលើកឡើងថា តាមការសង្កេតឃើញទំនិញគេចពន្ធរបស់ឈ្មួញធំៗ នៅតែបន្តហូរចូលយ៉ាងគគ្រឹកគគ្រេងដូចមុនដដែល តាមលំអានមេគយចាស់ដែលមានស្រាប់ ហើយដែលអំពើពុករលួយជាខ្សែបណ្ដោយនេះគឺត្រូវបានលោកមេគយ ទុំ ណូ មិនបានកែប្រែឬលុបបំបាត់នោះទេ បែរជាកំពង់តែបន្តរួមដៃបន្តចាត់តាំងមន្ត្រីថ្នាក់ក្រោមចាស់ៗនោះ ឲ្យអនុវត្តបន្តដាក់ការប្រមូលលុយគ្មានវិក្កយបត្រ ពីក្រុមឈ្មួញនាំទំនិញខុសច្បាប់និងបង់ពន្ធមិនគ្រប់ ដែលឆ្លងកាត់ផែទំនប់រលក ផែស្ទឹងហាវ ផែកែវផុស ផែលោកឧកញ៉ា សូ ជុងហួ យ៉ាងណែនក្នុងដៃដោយមិនគិតពីផែឯកជនតូចៗ ឬកំណែទម្រង់ក្នុងអង្គភាពគយដែលក្រសួងដាក់ចុះសូម្បីបន្ដិចណាសោះ ហើយធ្វើតាមតែរបៀបចាស់ដដែល។ តាំងពីបានចូលកាន់តំណែងភ្លាមគឺ លោក ទុំ ណូ មិនដែលខ្វល់ពីច្បាប់ទម្លាប់អ្វីទេ និយាយរួមគឺបានរឹតបន្ដឹងនិងដាក់គំនាបមន្ត្រីឲ្យរាយការណ៍ក្ដោបស្រង់ដើមពីប្រភពចំណូលខ្មៅលើគ្រប់ច្រកល្ហកទាំងអស់ ដែលកន្លងមកក្រុមមន្ត្រីគយខិលខូចមួយចំនួនបានលាក់ចែកគ្នាទុកច្រកចូលហោប៉ៅផ្ទាល់ខ្លួននោះ។
ករណីរឹតបន្តឹងរបស់លោក ទុំ ណូ ជ្រកក្រោមលេសគោលនយោបាយកំណែទម្រង់គយយ៉ាងតក់ក្រហល់ ត្រូវបានមន្ត្រីរិះគន់ថា កំណែទម្រង់ផ្ទៃក្នុងរបស់លោកមេគយថ្មី កំពុងតែកកូរកកាយដោះដូរមន្ត្រីផ្ទៃក្នុងតាមតែទំនើងចិត្ត។ លោក ទុំ ណូ ធ្វើការផ្ទេរដោះដូរជាបន្តបន្ទាប់ ដែលធ្វើឲ្យមន្ត្រីគយមួយចំនួនខ្លាចអស់តំណែងនោះ ឆក់ឱកាសចាយលុយមិនញញើត ក្នុងការរត់ការជ្រែឬដេញថ្លៃឡើងកាន់តំណែងល្អៗបាន។ ប្រភពបន្តថាលោក ទុំ ណូ ប្រធានសាខាគយនិងរដ្ឋាករខេត្តព្រះសីហនុ ទើបតែឡើងកាន់តំណែងថ្មីៗជំនួសលោក យ៉ឹក យូ គួរឲ្យភ្ញាក់ផ្អើលបំផុត ដោយសារតែអំពើពុករលួយ និងវប្បធម៌អន្តរាគមន៍ ក្នុងការតែងតាំងនិងផ្ទេរតំណែងក្នុងអគ្គនាយកដ្ឋានគយនិងរដ្ឋាករកំពុងកើតមាន។
គេសង្កេតឃើញ មន្ត្រីគយមុខខ្លាញ់មួយចំនួនបានព្យាយាមចាយលុយរាប់សិបដុំ ក្នុងការជ្រែឬដេញថ្លៃឡើងកាន់តំណែងល្អៗ បានដោយជោគជ័យ។
ពាក់ព័ន្ធជុំវិញករណីខាងលើនេះ លោក ទុំ ណី មិនអាចសូមការបកស្រាយបំភ្លឺពីករណីខាងលើនេះបានឡើយ? តែនិងព្យាយាមនៅពេលក្រោយ៕
