រាជធានីភ្នំពេញ ៖ មួយរយៈពេលកន្លងទៅនេះ បណ្ដាញសារព័ត៌មានក្នុងស្រុកបានធ្វើការផ្សព្វផ្សាយភាពមិនប្រក្រតី និងអំពើពុករលួយរបស់លោក លាង ហៃ ប្រធានការិយាល័យគយច្រកអាកាសយានដ្ឋានអន្តរជាតិភ្នំពេញ ដែលបានបែកធ្លាយជាបន្តបន្ទាប់។
ប្រភពបានឲ្យដឹងទៀតថា នៅការិយាល័យគយច្រកអាកាសយានដ្ឋានអន្តរជាតិភ្នំពេញមានកើតអំពើពុករលួយដូចជាតម្រូវឲ្យអ្នករត់ការឯកសារបង់លុយពី៣៥ទៅ៧៥ដុល្លារ គឺសម្រាប់ឯកសារត្រឹមត្រូវដែលគ្មានកំហុស ចំណែកឯកសារដែលមានកំហុសតិចតួច ត្រូវក្រុមមន្ត្រីគយក្រោមការគ្រប់គ្រងរបស់លោក លាង ហៃ គាបយកលុយពីការនាំចូលទំនិញយ៉ាងពេញបន្ទុកតែម្តង។ អាចនិយាយបានថាលោក លាង ហៃ កំពុងអនុវត្តន៍តាមរូបមន្តពុករលួយរបស់លោក ហ៊ីវ សុធារិទ្ធ អតីតប្រធានការិយាល័យគយច្រកអាកាសយានដ្ឋានអន្តរជាតិភ្នំពេញយ៉ាងខ្ជាប់ខ្ជួន គឺខំប្រឹងប្រមូលលុយតាមច្រើនរូបភាពដោយមិនខ្វល់ពីការរិះគន់ និងទង្វើបំពានច្បាប់អ្វីទាំងអស់។
បើតាមព័ត៌មានថា សម្រាប់ទំនិញវិនិយោគនាំចូលតាមច្រកអាកាសយានដ្ឋានអន្តរជាតិភ្នំពេញ អាចត្រូវបង់លុយប្រមាណ៧៥ដុល្លារ។ ក្នុងនោះទី១-ត្រូវបង់លុយ៥ដុល្លារសម្រាប់មន្ត្រីគយទទួលផែនចុះលេខឈ្មោះធឿន ទី២-បង់លុយចំនួន២០ដុល្លារសម្រាប់គណនេយ្យឈ្មោះ សារ៉ាន់ ទី៣-ត្រូវបង់លុយ១០ដុល្លារ សម្រាប់ប្រធានផ្នែកត្រួតពិនិត្យនិង១០ដុល្លារទៀតផ្នែកកូនចៅមន្ត្រីគយខាងត្រួតពិនិត្យ។ទី៤-ត្រូវបង់លុយ២០ដុល្លា សម្រាប់មន្ត្រីគយផ្នែកកាត់ស្តុកបញ្ចុះឯកសារ និងទី៥-ត្រូវបង់ឲ្យអនុប្រធានការិយាល័យចំនួន៥ដុល្លារ ជាកិច្ចបញ្ចប់ដោយគ្មានផ្លូវតវ៉ាបានឡើយ។
ករណីនេះមិនគួរលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏ដូចជាលោក គុណ ញឹម អគ្គនាយកគយ មើលរំលងនោះឡើយ គួរពិនិត្យមើលភាពមិនប្រក្រតីរបស់លោក លាង ហៃ ដែលប្រព្រិត្តអំពើពុករលួយ ព្រលែងកូនចៅអោយយកលុយតាមអំពើចិត្តផង។
លោក លាង ហៃ ពុំអាចសុំការបំភ្លឺបានឡើយ ព្រោះពុំមានលេខទូរសព្ទ័ តែនឹងព្យាយាមនៅពេលក្រោយ៕
