ខេត្តកំពង់ឆ្នាំង ៖ ប្រជាពលរដ្ឋបានអះអាងថា មានបទល្មើសនេសាទធ្វើសកម្មភាពយ៉ាងគគ្លើនក្នុងរដូវបិទនេសាទឆ្នាំនេះ ក្នុងទឹកដីស្រុកកំពង់លែង ខេត្តកំពង់ឆ្នាំង ខណៈមិនទាន់ឃើញមានសមត្ថកិច្ចជលផលធ្វើការទប់ស្កាត់ឬបង្ក្រាប សកម្មភាពនេះកើតឡើងបានដោយសារមានការត្រូវរ៉ូវគ្នា ជាមួយមន្ត្រីជំនាញរដ្ខបាលជលពីថ្នាក់ក្រោមដល់លើ គឺចាប់ផ្តើមចេញពីលោក ពុំ សុផល រហូតដល់នាយខណ្ឌ លោក សោម ភារុណ ។
ប្រភពព័ត៌មានពីប្រជាពលរដ្ឋខាងលើបានអោយដឹងទៀតថា ចំណុចដែលគេសង្កេតឃើញមានសកម្មភាពដាក់របាំងស្បៃមុងនេះ គឺនៅចំណុចវាលភក់ជាប់ព្រំប្រទល់ឃុំឆ្នុកទ្រូនៃស្រុកបរិបូណ៌ ចំណុចអូរច្រវ៉ាក់ ក្បាលកោះទន្លា ចំណុចបឹងផ្សោត និងនៅចំណុចជាច្រើនទៀតក្នុងឃុំថ្នល់ឈើទាល ឃុំសំរោងសែន និងឃុំស្វាយរំពារ នៃស្រុកកំពង់លែង ខេត្តកំពង់ឆ្នាំង ហើយសកម្មភាពដាក់របាំងស្បែមុងខាងលើនេះគឺដាក់ភ្ជឹតព្រែកតែម្តង ។
ប្រជានេសាទលក្ខណៈគ្រួសារបានលើកឡើងថា សកម្មភាពបទល្មើសក្នុងរដូវបិទនេសាទខាងលើនេះ មិនដឹងថាសមត្ថកិច្ចជលផលពីថ្នាក់ក្រោមរហូតដល់ថ្នាក់លើ និងសហគមន៏នេសាទ បានដឹងដែរឬទេ ? បានជាមិនឃើញមានការទប់ស្កាត់ និងបង្ក្រាបបទល្មើសនេះដែលកើតនោះ។
ដោយឡែកនៅតាមប្រឡាយឡើងទៅឃុំស្វាយរំពារ នៅចំណុចរោងចិញ្ចឹមទា មិនត្រឹមតែមានរបាំងលបស្បៃមុងនោះទេ វារួមមានទាំងការដាក់លបប្រឺស១០០ផងដែរ ដោយគ្មានការខ្លាចរអែងញញើតនឹងសមត្ថកិច្ចឡើយ កត្តានេះប្រជានេសាទលក្ខណៈគ្រួសារបានលើកឡើងថា ប្រហែលជាគេសែនត្រូវហើយទើបគេអាចដាក់របាំងស្បៃមុង និងលបប្រឺស១០០ ដែលច្បាប់ហាមឃាត់បានយ៉ាងរលូននៅកណ្តាលវាលបែបនេះ ។ ប្រភពមួយផ្សេងទៀត បានអោយដឹងថា នៅតំបន់តាមចំណុចនីមួយៗក្នុងស្រុកកំពង់លែងនេះ មិនត្រឹមតែមានសកម្មភាពបទល្មើស របាំងស្បៃមុង លបប្រឺស១០០តែប៉ុណ្ណោះទេ ថែមទាំងមានសកម្មភាពបទល្មើសមួយទៀតគឺសកម្មភាពឆក់ត្រីដែលបណ្តាលអោយហិនហោចពូជមច្ឆាជាតិថែមទៀតផង ។
ប្រជាពលរដ្ឋស្នើសុំអាជ្ញាធរខេត្តកំពង់ឆ្នាំងមេត្តាចុះមកត្រួតពិនិត្យនិងបង្ក្រាបបទល្មើសខាងលើនេះអោយបានទាន់ពេលវេលា បើមិនបង្ក្រាបទេនោះបទល្មើសទាំងនោះនឹងកើតឡើងជាច្រើនថែមទៀត ព្រោះថាបើមានគេដាក់បានគ្មានការបង្ក្រាបនោះ ប្រជាពលរដ្ឋផ្សេងៗទៀតក៏អាចដាក់បានដូចគ្នាដែរ ៕
