ភ្នំពេញ ៖ នៅព្រឹកថ្ងៃទី១៥ ខែមិថុនា ឆ្នាំ២០១៨ ឪពុកដែលប្រើអំពើហិង្សាទៅលើកូនបង្កើតរបស់ខ្លួន ហើយបានចែកចាយ និងបង្ហោះក្នុងប្រព័ន្ធផ្សព្វផ្សាយសង្គម (Facebook) ធ្វើឲ្យមានការរិះគន់ពីសំណាក់ប្រជាពលរដ្ឋនោះ ឥឡូវត្រូវបានកម្លាំងនគរបាលនៃនាយកដ្ឋានប្រឆាំងការជួញដូរ និងការពារអនីតិជន អគ្គស្នងការដ្ឋាននគរបាលជាតិ សហការជាមួយអង្គការការពារកុមារ (CPU) ចាប់ខ្លួនបានហើយ ។
ជនសង្ស័យឈ្មោះ ហ៊ិន សុផាន់ណា ភេទប្រុស អាយុ៣៩ឆ្នាំ ជាឱពុកបង្កើតកុមាររងគ្រោះ មានទីលំនៅផ្ទះលេខ៧៣ ផ្លូវព្រះមុន្នីរ៉េត សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។
សូមរំលឹកថា កាលពីប៉ុន្មានថ្ងៃមុននេះ វីដេអូឃ្លីបមួយត្រូវបានគេបង្ហោះក្នុងបណ្តាញទំនាក់ទំនងសង្គម (Facebook) ដែលបង្ហាញពីសកម្មកភាពបុរសម្នាក់ បានវាយធ្វើបាបកូនក្មេងម្នាក់យ៉ាងព្រៃផ្សៃ ហើយទទួលបានការចាប់អារម្មណ៍ និងរិះគន់យ៉ាងខ្លាំងពីមហាជននូវទង្វើដ៏ឃោរឃៅនេះ ។ ទើបនៅព្រឹកថ្ងៃទី១៥ ខែមិថុនា ឆ្នាំ២០១៨ កម្លាំងនគរបាលជំនាញនាយកដ្ឋានប្រឆាំងការជួញដូរមនុស្សនិងការពារអនីតិជន ឈានដល់កំណត់អត្តសញ្ញាណឃាត់ខ្លួនជនសង្ស័យជាឪពុកបានតែម្តង ៕
