ខេត្តរតនគិរី ៖ តាមសេចក្ដីរាយការណ៍បានឲ្យដឹងថានៅព្រឹកថ្ងៃទី១៣ ខែមិថុនា ឆ្នាំ២០១៨ ឈ្មួញរកស៊ីឈើខុសច្បាប់ដុះស្លែ២នាក់ប្តីប្រពន្ធឈ្មោះ ទូច និងប្រពន្ធឈ្មោះ ណាត ដែលមានឃ្លាំងស្តុកឈើជាច្រើនកន្លែងនៅក្នុងខេត្តរតនគិរី ដូចជានៅស្រុកវ៉ើនសៃ និងអូរវ៉ាកជាដើម កំពុងធ្វើសកម្មភាពប្រមូលទិញឈើនិងដឹកជញ្ជូនឈើយ៉ាងពេញបន្ទុកតែម្តងនិងដោយរលូន ក្រោមក្រសែភ្នែកលោក ថង សាវុន អភិបាលខេត្តរតនគីរី។
ឈ្មួញដុះស្លែឈ្មោះ ទូច និងប្រពន្ធឈ្មោះ ណាត រស់នៅភូមិថ្មី សង្កាត់ឡាបានសៀក ក្រុងបានលុង ខេត្តរតនគិរី ដែលប្រជាពលរដ្ឋម៉ាខេត្តស្គាល់ថាជាឈ្មួញជើងខ្លាំងបំផ្លាញព្រៃឈើ ពួកគេទាំង២នាក់ប្តីនិងប្រពន្ធបានប្រមូលកាប់និងទិញឈើប្រណិតពីប្រជាពលរដ្ឋនៅស្រុកវ៉ើនសៃ មកស្តុកទុកនៅទីរួមខេត្ត រួចបន្តដឹកយកទៅលក់នៅប្រទេសវៀតណាមបានយ៉ាងរលូន គ្មានសមត្ថកិច្ចឫជំនាញពាក់ពន្ធ័ចេញមុខបង្រ្កាបឡើយ ចំណែកលោក ថង សាវុន អភិបាលខេត្ត ក៏ពុំមានចំណាត់ក្តៅបង្ក្រាបការរត់ពន្ធឈើខុសច្បាប់របស់ឈ្មួញឈើទាំងពីរនាក់ប្តីប្រពន្ធនេះទេ។
ឈ្មួញម្នាក់ក្នុងចំណោមឈ្មួញជាច្រើនផ្សេងទៀតក្នុងខេត្តរតនគិរីដែលសុំមិនបញ្ចេញឈ្មោះបានឲ្យដឹងថា ពួកគាត់ដឹកឈើបានដោយរលូនត្រូវឆ្លងកាត់ការបង់លុយអោយសមត្ថកិច្ចពាក់ព័ន្ធមួយចំនួនតូចមិនតិចជាង៣០កន្លែងទេ ទំរាំធ្វើដំណើរទៅដល់ច្រកទ្វារអន្តរជាតិអូរយ៉ាដាវ ហើយការដឹកយកឈើទៅលក់នៅប្រទេសវៀតណាមទៀតសោត សំខាន់លើច្រកទ្វារ បើច្រកទ្វារមិនបើកឲ្យចេញ ក៏ពួកគាត់មិនដឹងថាដឹកយកទៅតាមណារួចនោះដែរ ហើយលោក អ៊ី ចំរើន ប្រធានច្រកគឺជាអ្នកទទួលខុសត្រូវក្នុងការបើកច្រកឲ្យនាំឈើចេញទៅប្រទេសវៀតណាម។
ពាក់ព័ន្ធការដឹកជញ្ជូនឈើឆ្លងដែនយកទៅលក់នៅប្រទេសវៀតណាម តាមច្រកទ្វារអន្តរជាតិអូរយ៉ាដាវខាងលើនេះ យើង មិនអាចសុំការបំភ្លឺណាមួយពីលោក អ៊ី ចំរើន ប្រធានច្រកទ្វារអន្តរជាតិអូរយ៉ាដាវ និងលោក ថង សាវុន អភិបាលខេត្តរតនគិរី បាននៅឡើយទេ តែនឹងព្យាយាមសុំការពន្យល់នៅពេលក្រោយ ៕
