ខេត្តកំពង់ធំ ៖ នៅថ្ងៃអាទិត្យ ១២រោច ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១០ ខែមិថុនា ឆ្នាំ២០១៨នេះ ឯកឧត្តមបណ្ឌិត ងួន ញ៉ិល សមាជិកគណៈអចិន្ត្រៃយ៍ គណៈកម្មាធិការកណ្តាល គណបក្សប្រជាជនកម្ពុជា អនុប្រធានទី២ រដ្ឋសភានៃព្រះរាជាណាចក្រកម្ពុជា និងជាប្រធានក្រុមការងារគណបក្សថ្នាក់កណ្តាលចុះជួយខេត្តកំពង់ធបានអញ្ជើញជាអធិបតីភាពដ៏ខ្ពង់ខ្ពស់ ពិធីបុណ្យពុទ្ធាភិសេកសម្ពោធឆ្លងអាគារពុទ្ធិកបឋមសិក្សា និងសមិទ្ធផលនានាក្នុងវត្ត ស្វាយភ្លើង ឃុំស្វាយភ្លើង ស្រុកបារាយណ៍ ខេត្តកំពង់ធំ ។
លោក ហាក់ ម៉ុងហួត អភិបាលនៃគណៈអភិបាលស្រុកបារាយណ៍ បានអញ្ជើញអានសុន្ទរកថាស្វាគមន៍ និងរបាយការណ៍សង្ខេប បានឱ្យដឹងថាសមិទ្ធិផលកំពុងធ្វើពិធីសម្ពោធនៅពេលនេះ បានចំណាយថវិកាសរុបចំនួន ៨០,៩១០ ដុល្លាសហរដ្ឋអាមេរិក ។
ឯកឧត្តមបណ្ឌិត ងួន ញ៉ិល បានអញ្ជើញមានប្រសាសន៍សំណេះសំណាលចំពោះព្រះសង្ឃ មន្ត្រីរាជការ ប្រជាជន និងក្មួយៗសិស្សានុសិស្សទាំងអស់ក្នុងពិធីដ៏អធិកអធមនោះ ដោយមនោសញ្ចេតនារីករាយស្និទ្ធស្នាល និងបានថ្លែងកោតសរសើរចំពោះព្រះមេគណខេត្ត អាជ្ញាធរស្រុក លោកយាយលោកតា បងប្អូនប្រជាពលរដ្ឋទាំងអស់ ដោយបានរួមគ្នាបង្កើតឱ្យមានសមិទ្ធផលនេះឡើង។
ឯកឧត្តមបណ្ឌិត ក៏បានមានប្រសាសន៍បញ្ជាក់អំពីតម្លៃនៃការទ្រទ្រង់គោរពប្រតិបត្តិរបស់ពុទ្ធសាសនិក ដើម្បីវិស័យព្រះពុទ្ធសាសនាតាំងនៅយូរអង្វែងតាមពុទ្ធប្បញ្ញត្តិ និងបានមាន ប្រសាសន៍បកស្រាយអំពីការវិវត្តនៃព្រឹត្តិការណ៍នយោបាយក្នុងប្រទេសកម្ពុជា ចាប់ពីមានព្រឹត្តិការណ៍ធ្វើរដ្ឋប្រហារទម្លាក់ សម្តេចព្រះនរោត្តម សីហនុ រហូតមកដល់ពេលបច្ចុប្បន្ននេះ ដោយបានបញ្ជាក់ជូនអំពីតម្លៃនៃសន្តិភាព ដែលជាមូលដ្ឋានគ្រឹះសំរាប់ធ្វើការអភិវឌ្ឍន៍ប្រទេសជាតិលើគ្រប់វិស័យ ។ និងជំរុញឱ្យប្រជាជនអញ្ជើញទៅបោះឆ្នោតជ្រើសតាំងតំណាងរាស្ត្រ អាណត្តិទី៦ នៅថ្ងៃទី២៩ ខែកក្កដា ឆ្នាំ២០១៨ ឱ្យបានគ្រប់ៗគ្នា ក្នុងន័យបំពេញកាតព្វកិច្ចជាពលរដ្ឋ ដើម្បីជោគវាសនាខ្លួន និងដើម្បីចូលរួមជាមួយរាជរដ្ឋាភិបាល បន្តអនុវត្តនូវលទ្ធិប្រជាធិបតេយ្យ និងការរីកចំរើនរបស់សង្គមជាតិយើងទៀត ។ ឯកឧត្តមបណ្ឌិត ក៏បានលើកឡើងអំពី ទោសទណ្ឌ ដែលត្រូវអនុវត្តចំពោះអ្នកធ្វើសកម្មភាពរារាំងមិនឱ្យពលរដ្ឋអញ្ជើញទៅបោះឆ្នោតផងដែរ ។
ពិធីដ៏អធិកអធមនេះ បានបញ្ចប់បន្ទាប់ពីឯកឧត្តមបណ្ឌិត ងួន ញ៉ិល អញ្ជើញបំពាក់គ្រឿងឥស្សរិយយស មេដាយស្ថាបនាជាតិ ប្រគេនចែកជូនថវិកា សម្ភារៈ ចំពោះព្រះសង្ឃ មន្ត្រីរាជការ សប្បុរសជន ប្រជាជន និងពិធីកាត់ខ្សែបូរសម្ពោធដាក់ឱ្យប្រើប្រាស់ជាផ្លូវការ នូវសមិទ្ធផលនានារួចមក ៕
