សៀមរាប ៖ បុរសម្នាក់ត្រូវបាននគរបាលខេត្តសៀមរាប សហការជាមួយនគរបាលខេត្តបាត់ដំបង ឃាត់ខ្លួន នៅផ្ទះសំណាក់ប៉ៅអី ចំនុចស្ដុបបេនឡានចុងកៅស៊ូ សង្កាត់ស្លក្រាម ក្រុងសៀមរាប ក្រោយពីធ្វើសកម្មភាពចាប់ក្មេងស្រីម្នាក់ជំរិតទារលុយ។
លោកឧត្តមសេនីយ៍ ភឹង ចិន្ដារ៉េត ស្នងការរងទទួលបន្ទុកផែនព្រហ្មទណ្ឌ បានប្រាប់ក្នុងកិច្ចសម្ភាសន៏ថា ក្រោមការសហការ រវាងការិយាល័យព្រហ្មទណ្ឌកំរិតធ្ងន់ខេត្តបាត់ដំបង និងការិយាល័យព្រហ្មទណ្ឌកំរិតធ្ងន់ខេត្តសៀមរាប ដោយមានការចង្អុលបង្ហាញពីលោកស្នងការទាំង២ខេត្ត នៅព្រឹកថ្ងៃទី០៦ ខែមិថុនា ឆ្នាំ២០១៨ វេលាម៉ោង១០និង១៥នាទី សមត្ថកិច្ចបានបង្ហាញមុខជនសង្ស័យម្នាក់ឈ្មោះ រ៉ន ទិច ( អាទី ) អាយុ៣៤ឆ្នាំ មុខរបរជាកម្មករនៅប្រទេសថៃ។ ចំណែក ក្មេងស្រីឈ្មោះ ប៉ន ចាន់សុភា អាយុ៩ឆ្នាំ រស់នៅភូមិដូង ឃុំបឹងរាំង ស្រុកកំរៀង ខេត្តបាត់ដំបង រស់នៅជាមួយម្ដាយ ធ្វើកម្មករនៅប្រទេសថៃ។
ដោយជនសង្ស័យបានធ្វើសកម្មភាពចាប់ក្មេងស្រីនៅចំនុចច្រកឡែម ជាប់ព្រំដែនថៃនៅថ្ងៃទី៣ ខែមិថុនា ឆ្នាំ២០១៨ ហើយរត់គេចមកជ្រកកោននៅខេត្តសៀមរាប។
លោកឧត្តមសេនីយ៍ ភឹង ចិន្ដារ៉េត ស្នងការរងទទួលបន្ទុកផែនព្រហ្មទណ្ឌ បានឲ្យដឹងថា ជនសង្ស័យជាឪពុកចុង បានចាប់កូនជំរិតទារប្រាក់ប្រពន្ធ ដោយសារខឹងប្រពន្ធសុំលុយ២លានរៀលមិនបាន ក៏ចាប់កូនស្រីជំរឹតទារប្រាក់តែម្ដងទៅ ក្រោយឃាត់ខ្លួនជនសង្ស័យត្រូវបានប្រគល់ជូនស្នងការខេត្តបាត់ដំបង កសាងសំនុំរឿងចាត់ការតាមច្បាប់៕
