ខេត្តមណ្ឌលគិរី ៖ ប្រភពពត័មានពីប្រជាសហគមន៍ការពារព្រៃឈើក្នុងស្រុកពេជ្រាដា ខេត្តមណ្ឌលគិរី បានឲ្យដឹងថា ប៉ុន្មានថ្ងៃនេះ ឈ្មួញជនជាតិវៀតណាមបានជួលឈ្មួញខ្មែរ ដែលត្រូវបានគេស្គាល់ថាឈ្មោះ ឆុង និង ឈ្មោះ អាត ជាមេយោធាស្រុក បានដឹកជញ្ជូនឈើខុសច្បាប់តាមរថយន្ត ចេញទៅស្រុកយួនតាមច្រក ណាំលៀ ឬប៉ុស្តិ៍៧ យ៉ាងរលូន មិនមានការរាំងស្ទះអ្វីឡើយ ដោយសារបុគ្គលអាជ្ញាធរខេត្ត-ស្រុក រួមនិងសមត្ថកិច្ចពាក់ពន្ឋ័ លាបាតដៃទទួលប្រាក់ ពីឈ្មួញជនជាតិវៀតណាមនិងមេឈ្មួញជនជាតិខ្មែររួចហើយ។
ទាក់ទងនឹងបញ្ហានេះ ប្រភពពីមន្ត្រីអាជ្ញាធរ និងសមត្ថកិច្ចមូលដ្ឋានក្នុងស្រុកពេជ្រាដា ខេត្តមណ្ឌលគិរី បានឲ្យដឹងថា លោក សំរិទ្ធ ណយ ដែលជាមេប៉ុស្តិ៍ច្រកណាំលៀ ឬប៉ុស្តិ៍៧ គឺជាអ្នកឃុបឃិតបើកភ្លើងខៀវឲ្យឈ្មួញជនជាតិវៀតណាម និងមេឈ្មួញខ្មែរដឹកជញ្ជូនឈើយ៉ាងអាណាធិបតេយ្យ ដោយមិនខ្លាចរអែងច្បាប់សោះឡើយ ដើម្បីជាថ្នូរ នឹងលាភសក្ការៈផ្ទាល់ខ្លួនយ៉ាងច្រើន។
ឈើទាំងនោះភាគច្រើន ប្រមូលមកពីស្រុកកោះញែក យកមកគរទុកនៅជិតចម្ការកៅស៊ូ បារាំង និងដាក់ឡាក់ ចម្ការម្រេច ស្ថិតក្នុងស្រុកប៊ូស្រា ស្រុកពេជ្រាដា ខេត្តមណ្ឌលគិរី ដើម្បីលើកដាក់ឡានឡង់គ្រីស័រកែច្នៃដឹកទៅប្រទេសវៀតណាម ។ ពួកឈ្មួញត្រៀមចេញឈើរួចជាស្រេច ខណៈមួយរយៈនេះ ការនាំឈើចេញទៅវៀតណាមតាមរថយន្តម្តង ៥០-៦០គ្រឿងបានជោគជ័យ ទើបសកម្មភាពបទល្មើសនេះកាន់តែសម្រុក ហើយសមត្ថកិច្ចច្រកនេះតែម្តងបានយកចិត្តទុកដាក់បំផុតរាល់បទល្មើសព្រៃឈើឆ្លងកាត់ គឺរាប់ក្បាលឡានយកប្រាក់យ៉ាងស្រួល ក្រោមការឃុបឃិតបើកដៃពីសំណាក់លោក សំរិទ្ធ ណយ មេប៉ុស្តិ៍៧ ដែលមានខ្នងបង្អែករឹងមាំ ។
ពាក់ព័ន្ធនឹងបទល្មើសដឹកជញ្ជូនឈើនេះ លោក ផូ សំអន ប្រធានស្នាក់ការ ប៉ុស្តិ៍៧-ណាំលៀ បានប្រាប់បណ្តាញពត័មានបដិសេធថា គ្មានសកម្មភាពបទល្មើសនេះទេ ហើយលោក សំរិទ្ធ ណយ មេប៉ុស្តិ៍៧ ដែលគេទទួលស្គាល់ថាជាមេក្លោងយូរឆ្នាំមកហើយជាប់ពាក់ព័ន្ធនឹងបទល្មើសព្រៃឈើ តាមរយៈការបើកបារ៉ាសឲ្យឈ្មួញដឹកជញ្ជូនឈើទាំងយប់ទាំងថ្ងៃទៅវៀតណាមតាមប៉ុស្តិ៍៧នេះ មិនអាចសុំការបំភ្លឺបានទេ តែនឹងព្យាយាមសុំការបំភ្លឺនៅពេលក្រោយ ៕
