ភ្នំពេញ៖ នៅព្រឹកថ្ងៃទី៣១ ខែឧសភា ឆ្នាំ២០១៨ ប្រជាពលរដ្ឋចំនួន៥៦គ្រួសារ រស់នៅភូមិដូនអុក សង្កាត់ត្រពាំងក្រសាំង ខណ្ឌពោធិសែនជ័យ រាជធានីភ្នំពេញ បាននាំគ្នាមកក្រសួងរៀបចំដែនដីនគរូបនីយកម្ម និងសំណង់ សុំអោយក្រសួងដោះស្រាយករណីសមាគមចិនហុកគៀនខ្ចីដីពួកគាត់កប់ខ្មោច ហើយយកទៅលក់ឲ្យអ្នកផ្សេង អោយបានឆាប់ជូនពួកគាត់ចំណែកខាងក្រសួងបានណាត់ជួបនៅថ្ងៃទី៤ ខែមិថុនា ខាងមុខនេះ។ ការដែលប្រជាពលរដ្ឋនាំគ្នាមកសុំអន្តរាគមន៍នេះ គឺបន្ទាប់ពីប្រជាពលរដ្ឋបានដាក់ញ្ញត្តិទៅក្រសួងរៀបចំដែនដីនគរូបនីយកម្ម និងសំណង់ កាលពីថ្ងៃទី២៦ ខែកុម្ភៈ ឆ្នាំ២០១៨ ដែលរហូតមកដល់ពេលនេះ មិនទាន់ឃើញមានដំណោះស្រាយនៅឡើយ ។
ប្រជពលរដ្ឋឲ្យដឹងថា ដីដែលមានទំហំ១៣ហិកតា ប្រជាពលរដ្ឋទាំងអស់គ្នាមករស់នៅលើដីនេះតាំងពីឆ្នាំ១៩៧៩ ដោយប្រកបរបរធ្វើស្រែនិងដាំដំណាំផ្សេង។ លុះក្រោយមកនៅថ្ងៃទី២៦ ខែសីហា ឆ្នាំ១៩៨៧ គឺសមាគមចិន ហុក គៀន បានដាក់ពាក្យស្នើសុំខ្ចីដីទាំងនេះពីប្រជាពលរដ្ឋទាំង៥៦គ្រួសារ ដោយមានអាជ្ញាធរដែនដី់ទទួលស្គាល់ដឹងឮពិតប្រាកដ សម្រាប់យកទៅធ្វើកន្លែងគោរពសក្ការៈបុណ្យប្រពៃណីចិនម្តងៗ ដោយប្រជាពលរដ្ឋយល់ឃើញថា មានមូលហេតុសមរម្យក៏បានអនុញ្ញាតអោយសមាគមចិនហុកគៀនខ្ចីប្រើប្រាស់បណ្តោះអាសន្ន។
រហូតមកដល់ឆ្នាំ២០១១ សមាគមចិន ហុក គៀន រកទីតាំងថ្មីបានរុះរើម៉ុងចេញបាត់ទៅ ដោយធ្វើការឈូសឆាយម៉ុងទាំងអស់ចេញនិងរុះរើផ្ទះ លុបអណ្តូងទឹកមួយកន្លែងចោលទៀត ក៏ប្រគល់ដីទាំងនោះមកអោយប្រជាពលរដ្ឋកាន់កាប់វិញ។ ស្រាប់តែឥឡូវមានឈ្មោះ សេង ស៊ីហេង បានចេញមុខអះអាងថា ដីទាំងនេះជាដីរបស់ខ្លួន ជាតំណាងអោយសមាគមចិន ហុក គៀន ទៅវិញ។ ប្រជាពលរដ្ឋទាំង៥៦គ្រួសារ ពុំមានការយល់ព្រមសុខចិត្តអោយឈ្មោះ សេង ស៊ីហេង មករំលោភបំពានដី១៣ហិកតា មកធ្វើជាកម្មសិទ្ធិរបស់ខ្លួនជាដាច់ខាត។
សូមរំលឺកថា ប្រជាពលរដ្ឋបានដាក់ញ្ញត្តិសុំអន្តរាគមន៍នៅខុទ្ទកាល័យសម្តេចនាយករដ្ឋមន្ត្រី ហ៊ុន សែន កាលពីថ្ងៃទី០៤ ខែឧសភា ឆ្នាំ២០១៨ ដើម្បីសុំឲ្យសម្តេចតេជោ ហ៊ុន សែន ជួយអន្តរាគមន៍និងផ្តល់ភាពយុត្តិធម៌ដល់ពួកគាត់ ដែលសមាគមចិន ហុក គៀន យកដីម៉ុងខ្មោច ដីខ្ចីប្រជាពលរដ្ឋយកកប់ខ្មោច ទៅលក់អោយអ្នកផ្សេង៕
