ភ្នំពេញ ៖ លោកឧត្តមសេនីយ៍ឧកញ៉ា ហូ ចំរើន ដែលកំពុងជាប់ឃុំនៅពន្ធនាគារម១ ហៅព្រៃស ក្រោមបទគម្រាមជិវិត(បាញ់សេរី) ត្រូវបានព្រះមហាក្សត្រ សម្រេចបញ្ចប់ទាំងមុខតំណែងជាទីប្រឹក្សាផ្ទាល់សម្ដេចតេជោ ហ៊ុន សែន នាយករដ្ឋមន្រ្តី និងថែមទាំងលុបឈ្មោះចេញពីក្របខ័ណ្ឌ នៃកងយោធពលខេមរភូមិន្ទ តែមិនឃើញការលុបគោរម្យងារឧកញ៉ានៅឡើយទេ។ យោងតាមព្រះរាជក្រឹត្យរបស់ព្រះមហាក្សត្រ ចុះហត្ថលេខាចម្លងដោយលោក សយ សុខា អគ្គលេខាធិការរាជរដ្ឋាភិបាល កាលពីថ្ងៃទី២៣ ខែឧសភា ឆ្នាំ២០១៨ បានឲ្យដឹងថា “មាត្រា១ ៖ បញ្ចប់មុខតំណែងឯកឧត្តម ហូ ចំរើន ពីទីប្រឹក្សាផ្ទាល់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មានឋានៈស្មើរដ្ឋលេខាធិការ” និង “មាត្រា២ ៖ លុបឈ្មោះ ឯកឧត្តម ឧត្តមសេនីយ៍ឯក ហូ ចំរើន អត្តលេខ ០០២៩៥៨ នាយទាហានថ្នាក់ឧត្តមសេនីយ៍ នៃកងយោធពលខេមរភូមិន្ទ ចេញពីក្របខ័ណ្ឌនៃកងយោធពលខេមរភូមិន្ទ”។
