រាជធានីភ្នំពេញ ៖ សម្តេច ហ៊ុន សែន នាយករដ្ឋមន្ត្រីកម្ពុជា បានសរសេរនៅលើបណ្តាញ Facebook ថា«សូមផ្ញើសេចក្តីនឹករលឹក ដល់បងប្អូនជនរួមជាតិ និងកូនក្មួយៗយុវជនទាំងអស់។
ថ្ងៃបោះឆ្នោតជ្រើសតាំងតំណាងរាស្ត្រ គឺកាន់តែជិតមកដល់ហើយនៅថ្ងៃទី២៩ ខែកក្កដា ឆ្នាំ២០១៨។ កម្ពុជាទូទាំងប្រទេសសប្បាយរីករាយ ចំពោះការបោះឆ្នោតខាងមុខនេះ ព្រោះយើងមានឱកាសបានប្រើប្រាស់ នូវសិទ្ធិសេរីភាព ក្នុងការបោះឆ្នោតជ្រើសរើសគណបក្សនយោបាយ ដែលយើងម្នាក់ៗពេញចិត្ត។
មកទល់ពេលនេះ រាជរដ្ឋាភិបាលដែលដឹកនាំដោយគណបក្សប្រជាជន គឺបានកសាងសមិទ្ធផលជាតិជាច្រើន ដើម្បីបម្រើសេចក្តីត្រូវការ របស់បងប្អូនប្រជាពលរដ្ឋ។ ទិសដៅនៃការអភិវឌ្ឍរបស់យើង គឺនឹងប្រែក្លាយកម្ពុជាឲ្យទៅជាប្រទេស ដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានប្រាក់ចំណូលខ្ពស់នៅឆ្នាំ ២០៥០។ ទន្ទឹមនឹងនេះដែរ គឺគណបក្សប្រជាជនគាំទ្រនិងលើកទឹកចិត្តឲ្យកូនក្មួយយុវជន មានឱកាសបានចូលរួមកាន់តែច្រើនឡើងៗ នៅក្នុងការអភិវឌ្ឍប្រទេសជាតិ។
