ខេត្តព្រះសីហនុ ៖ នៅវេលាម៉ោង១១និង០០នាទីយប់រំលងអធ្រាត ថ្ងៃទី២៧ ខែឧសភា ឆ្នាំ២០១៨ បុរសជនជាតិវៀតណាមម្នាក់បានស្លាប់ ក្រោយពីបានបញ្ជូនទៅកាន់មន្ទីរពេទ្យ និងស្ត្រីម្នាក់ទៀតបានរងរបួសធ្ងន់ ក្នុងករណីគ្រោះថ្នាក់ចរាចរណ៍មួយ បង្កដោយរថយន្តជនជាតិចិន បានបុកនិងម៉ូតូក្នុងទិសដៅបញ្ច្រាស់គ្នានៅផ្លូវឯករាជ្យ ខាងកើតស្នងការដ្ឋាននគរបាលខេត្តព្រះសីហនុ ស្ថិតនៅសង្កាត់លេខ៣ ក្រុង.ខេត្តព្រះសីហនុ ។
សមត្ថកិច្ចបានឲ្យដឹងថា ជនជាតិចិនបានបើករថយន្តមួយគ្រឿងម៉ាក HIGHLANDER ពណ៌ស្លែពាក់ស្លាកលេខភ្នំពេញ2X-4086 បុកជាមួយម៉ូតូម៉ាក ARBLADE ពណ៌សលាយក្រហម គ្មានស្លាកលេខ បើកបរដោយឈ្មោះ វ័ន វ៉ាន់ឆាង ភេទ ប្រុស អាយុ២៤ឆ្នាំ ជនជាតិវៀតណាម មុខរបរកម្មករសំណង់ ស្នាក់នៅក្នុងភូមិ២ សង្កាត់លេខ២ ក្រុង.ខេត្តព្រះសីហនុ បណ្តាលឲ្យស្លាប់ក្រោយបញ្ជូនទៅមន្ទីរពេទ្យ ។
ចំណែកអ្នករួមដំណើរជាមួយរថយន្តបង្កឈ្មោះ ZHENG LI XIAI ជនជាតិចិនបានរងរបួសធ្ងន់ បានបញ្ជូនទៅព្យាបាលនៅគ្លីនិកមិត្តភាព ។ ចំពោះអ្នកបើករថយន្ត ជនជាតិចិនដែលគ្មានប័ណ្ណបើកបរ សមត្ថកិច្ចបាននាំខ្លួនមកកាន់ការិយាល័យនគរបាលចរាចរណ៍ផ្លូវគោក ដើម្បីអនុវត្តតាមនីតិវិធី៕
