ភ្នំពេញ ៖ កាលពីថ្ងៃទី២៣ ខែឧសភា ឆ្នាំ២០១៨ លោក សម រង្ស៊ី អតីតប្រធានគណបក្សសង្គ្រោះជាតិ បានថ្វាយលិខិតទៅព្រះមហាក្សត្រ ដើម្បីសុំឲ្យព្រះអង្គគង់នៅជាអាជ្ញាកណ្ដាល ដើម្បីផ្សះផ្សាជាតិ ខណៈស្ថានការណ៍នយោបាយកំពុងមានភាពចម្រូងចម្រាសខ្លាំង ក្រោយពីអតីតបក្សប្រឆាំង ត្រូវបានផាត់ចេញពីការបោះឆ្នោត។ អតីតមេបក្សប្រឆាំង លើកឡើងជាថ្មីទៀតថា ការបោះឆ្នោតខែកក្កដាខាងមុខ គឺជាការបោះឆ្នោតក្លែងក្លាយ ពោរពេញដោយការបង្ក្រាបពលរដ្ឋនិងមិនអនុវត្តតាមលទ្ធិប្រជាធិបតេយ្យ ដែលតម្រូវឲ្យមានវត្តមាន គណបក្សប្រឆាំងចូលរួម ។
ប៉ុន្តែលោក សួស យ៉ារ៉ា អ្នកនាំពាក្យគណបក្សកាន់អំណាចបានប្រកាសថ្កោលទោស ការស្នើសុំ អន្តរាគមន៍ពីព្រះមហាក្សត្របែបនេះ ។ លោកថា លោក សម រង្ស៊ី ខ្លួនឯងទេដែលកំពុងរារាំងពលរដ្ឋកុំឲ្យចេញទៅបោះឆ្នោត និងចាត់ទុកថា លិខិតរបស់លោក សម រង្ស៊ី កំពុងបញ្ជាព្រះមហាក្សត្រ។ លោកថា រដ្ឋាភិបាលដឹកនាំដោយគណបក្សប្រជាជន កំពុងអនុវត្តតាមច្បាប់ និងមិនដែលដាក់សំពាធណាមួយលើប្រជាពលរដ្ឋឡើយ។
លោកអះអាងថា បើទោះជាគ្មានវត្តមានអតីតគណបក្សសង្គ្រោះជាតិ ក៏នៅមានគណបក្សនយោបាយ២០ទៀត នឹងចូលរួមប្រកួតប្រជែងបោះឆ្នោតថ្នាក់ជាតិខាងមុខនេះ ។
ចំណែកលោក សុខ ឥសាន អ្នកនាំពាក្យ CPP ដែរនោះបានប្រតិកម្មថា គឺជាទស្សនៈភ្លីភ្លើខ្លាំងណាស់ដែលទណ្ឌិត សម រង្ស៊ី ឈឺឆ្អាលជំនួសព្រះមហាក្សត្រ ដែលហ៊ានធ្វើលិខិតទូលព្រះមហាក្សត្រថា ម្រមុខរាជរដ្ឋាភិបាលគាបសង្កត់ព្រះមហាក្សត្រ ។ លោកថា ខ្លឹមសាររបស់ទណ្ឌិត សម រង្ស៊ី គ្រាន់តែជាការ ញុះញង់បំបែកបំបាក់រវាងស្ថាប័នព្រះមហាក្សត្រ និងស្ថាប័ននីតិប្រតិបត្តិ ដែលទណ្ឌិត សម រង្ស៊ី តែងតែប្រើវប្បធម៌លាបពណ៌ ចំពោះអ្នកដទៃជាដរាប ៕
