ខេត្តមណ្ឌលគិរី ៖ តាមសេចក្តីរាយការណ៏បានឲ្យដឹងថា សកម្មភាពដឹកជញ្ជូនឈើប្រណីតឆ្លងដែនដោយខុសច្បាប់ ដោយមេឈ្មួញជើងខ្លាំងមួយរូបយកទៅលក់នៅប្រទេសវៀតណាម តាមច្រកទ្វារទ្វេភាគីអន្តរជាតិដាក់ដាំ និងច្រកប្រាំពីរ(ណាំលៀ) ខេត្តមណ្ឌលគិរី នៅតែកើតមានយ៉ាងអនាធិបតេយ្យ ដោយអាជ្ញាធរនិងសមត្ថកិច្ចពាក់ព័ន្ធធ្វើឬកកន្ទេលធំបន្លំដេក តាមរយៈថាមិនហ៊ានប៉ះពាល់ជាមួយនិងមេឈ្មួញនោះទេ? ។
មេឈ្មួញជើងខ្លាំងជាងតោដែលគេរាយការណ៍ថាមានសកម្មភាពដឹកជញ្ជូនសកម្មជាងគេនោះមាន ឈ្មោះ ម៉ាប់ រហ័ស្សនាម អាក្របី ដែលកន្លងមកគេដឹងថា ម្សៀនេះជាមនុស្សជិតស្និទជាមួយលោកឧត្តមសេនីយ៍ឧកញ៉ា ហ៊ុន ជា ដែលកំពុងជាប់គុកពីបទបាញ់បោះសេរីគម្រាមសម្លាប់។
បច្ចុប្បន្ន ម្សៀម៉ាប់ឬអាក្របីបាននិងកំពុងធ្វើសកម្មភាពប្រព្រឹត្តបទល្មើសព្រៃឈើ ដឹកជញ្ជូនឈើឆ្លងដែនដោយខុសច្បាប់យកទៅលក់នៅប្រទេសវៀតណាម តាមច្រកដាក់ដាំ និងច្រកប្រាំពីរ(ណាំលៀ) ខេត្តមណ្ឌលគិរី គគ្រឹកគគ្រេងដូចគេហែរកឋឹនជារៀងរាល់យប់ តាមរថយន្តសាំយ៉ុងយ៉ាងតិច៦០គ្រឿង ដោយមានរថយន្តឡង់គ្រីសរ័ពាក់ស្លាកលេខ០០៧នាំមុខគ្មាន សម្ថកិច្ចណាអើពើបង្រ្កាបក្រៅពីដេកលាដៃចាំទទួលលាភសក្ការៈនោះឡើយ? ។
សូមបញ្ជាក់ថា បន្ទាប់ពីមានករណីបាញ់ប្រហារបណ្តាលឲ្យស្លាប់អ្នកការពារព្រៃឈើបីនាក់នៅប៉ុស្តិព្រុំដែន អូរលែរ កាលពីប៉ុន្មានខែកន្លងទៅនេះ ហើយជនបង្កមិនទាន់ឃើញផ្តន្ទាទោសដាក់គុកប៉ុន្មានឆ្នាំផងនោះ គេឃើញថា ឈ្មោះ ម៉ាប់ហៅក្របីនេះហាក់បីដូចជាកំពុងជិះសេះលែងដៃ មិនខ្វល់ខ្វាយពីមន្ត្រីជំនាញណាហ៊ានចូលទៅតំបន់នោះទៀតទេ ទើបក្រុមរថយន្តដឹកឈើរបស់អាម៉ាប់ បានដំណើរការយ៉ាងរលូនជាមួយសមត្ថកិច្ចគ្រប់ផ្នែកទាំងអស់ ដែលប្រចាំការនៅច្រកដាក់ដាំនេះតែម្ដង ។
សូមរំលឹកថា កាលពីអំឡុងខែកញ្ញា ឆ្នាំ២០១៦ ម្សៀម៉ាប់នេះបានបាញ់កាំភ្លើងអាកាជាច្រើនគ្រាប់ គម្រាមសម្លុតគេឯងនៅមុខបញ្ជាការប៉េអឹមស្រុកអូរាំង តែគ្មានអ្នកណាហ៊ានធ្វើអីម្សៀម៉ាប់ឡើយ ផ្ទុយទៅវិញពួកគេបែជាខំជួយបន្លប់បំបិទរឿងទៅវិញ! ហើយប្រជាពលរដ្ឋនិយាយថា នេះអាម៉ាប់ចេះបាញ់នៅចុងកាត់មាត់ញក បើខ្លាំងហ៊ានបាញ់នៅភ្នំពេញ ច្បាស់ជាបានជាប់គុកដូចលោក ហ៊ុន ជា ជាពុំខាន។ប្រភពបានខ្សឹបប្រាប់ថា ម្ចាស់រថយន្តឡង់គ្រីស័រដឹកឈើជាច្រើនគ្រឿងនេះ ត្រូវបានគេស្គាល់ឈ្មោះថាជារបស់អាម៉ាប់ហៅក្របី បានរត់ការជាមួយស្ថាប័នពាក់ព័ន្ធនៅក្នុងខេត្តមណ្ឌលគីរីរួចអស់ហើយបានជាស្ងាត់ឈឹងចឹងនោះ។
ប្រជាពលរដ្ឋបានសំណូមពរដល់លោក ឡោក សុខា ស្នងការនគរបាលខេត្តមណ្ឌលគិរី និងជាពិសេសលោក ស្វាយ សំអ៊ាង អភិបាលខេត្តមណ្ឌលគីរី ត្រូវមានវិធានការទប់ស្កាត់បង្ក្រាបផង ជៀសវាងប្រជាពលរដ្ឋរិះគន់ថាម្សៀម៉ាប់ហៅអាក្របីនិងចៅហ្វាយខេត្តគឺតែមួយ!?ព្រោះមិនឃើញអាជ្ញាធរហ៊ានចាប់ឈើអាក្របីម្តងណាសោះឡើយ៕
