ខេត្តព្រះសីហនុ ៖ តាមប្រភពពត័មានបានឲ្យដឹងថា ចាប់តាំងពីអគ្គនាយដ្ឋានគយ និងរដ្ឋាករកម្ពុជា ក្រោមឆត្រ័លោក គុណ ញឹម អគ្គនាយកគយ ចាត់តាំងលោក ទុំ ណូ ឲ្យធ្វើជាប្រធានសាខាគយខេត្តព្រះសីហនុដើម្បីពង្រឹងប្រសិទ្ធភាពប្រព័ន្ធឲ្យមានកំណើនប្រសើរជាងមុននោះ ឈានទៅលុបបំបាត់អំពើពុករលួយមក ក៏នៅតែមានសចក្តីរាយការណ៍ថា បទល្មើសគេចពន្ធដែលកើតចេញពីការត្រូវគ្នារវាងគយនិងឈ្មួញគឺនៅតែមានជាដ៏ដែល។ គេសង្កេតឃើញទំនិញគេចពន្ធរបស់ឈ្មួញធំៗ នៅតែបន្តហូរចូល យ៉ាងគគ្រឹកគគ្រេងដូចមុនដដែល ដោយគេសង្ស័យថាលោក ទុំ ណូ ដែលកំពុងកាន់តំណែង កំពុងដើរតាមគន្លងរបស់មន្ត្រីគយចាស់ គឺបន្តការចាត់តាំងមន្ត្រីថ្នាក់ក្រោមឲ្យប្រមូលលុយគ្មានវិក្កយប័ត្រ ពីឈ្មួញនាំទំនិញខុសច្បាប់ និងបង់ពន្ធមិនគ្រប់ ដែលឆ្លងកាត់ផែទំនប់រលក ផែស្ទឹងហាវ ផែកែវផុស ។ល។
ទំនិញគេចពន្ធហូរចូលតាមស្នាក់ការគយនិងរដ្ឋាករទាំង៣ គឺស្នាក់ការផែទំនប់រលក កែវផុស និងស្ទឹងហាវ ដែលឋិតក្រោមការគ្រប់គ្រងរបស់សាខាគយនិងរដ្ឋាករខេត្តព្រះសីហនុ ត្រូវបានគេទម្លាយថា រដ្ឋនៅតែមានបាត់បង់ចំណូលពន្ធនាំចូលយ៉ាងច្រើនក្នុង១ខែៗ ដោយសារមន្ត្រីគយឃុបឃឹតជាមួយឈ្មួញទុកស៊ីក្រោមលេសចំណូលពន្ធទូទាំងប្រទេសកើនឡើងលើសផែនការកំណត់។
លោក ទុំ ណូ ប្រធានសាខាគយខេត្តព្រះសីហនុ ក្រោមឆត្រ័លោក គុណ ញឹម អគ្គនាយកគយ ត្រូវបានគេបង្ហើបថា បានម៉ៅដាច់អោយខាងស្នាក់ការគយទាំង៣គយទំនប់រលក កែវផុស ស្ទឹងហាវ បង់លុយជាកញ្ចប់ឡើងលើដោយបែងចែកហែកប្រយោជន៍ចែកគ្នាតាមតួនាទីនិងភារកិច្ច។
មួយវិញទៀតដោយសំអាងថា ការប្រមូលចំណូលពន្ធគ្រប់ផែនការថ្នាក់លើសព្វថ្ងៃ ប្រធានសាខាគយនិងរដ្ឋាករ ខេត្តព្រះសីហនុបាននិងសំងំស៊ីដាច់លុយពីមធ្យោបាយដឹកជញ្ជូនទំនិញគេចពន្ធលើលំហរសមុទ្រ ដែលនាំចូល តាមច្រកស្នាក់ការទាំង៣យ៉ាងត្រជាក់ចិត្ត។ ក្នុងនោះស្នាក់ការគយនិងរដ្ឋាករទំនប់រលក មានការនាំចូលទំនិញគេចពន្ធលក្ខណះទ្រង់ទ្រាយធំ ដូចជាម៉ូតូស៊េរីទំនើបៗ គ្រឿងសំណង់ ទំនិញគ្រឿងទេស ដែលគេចពន្ធឬបង់ពន្ធនាំចូលមិនគ្រប់តាមរបៀបក្លែងភេទទំនិញ ដូចជាទំនិញតំលៃខ្ពស់មកបង់ពន្ធជាទំនិញចាប់ហួយទៅវិញ។ ក្រៅពីនេះប្រភពចំណូលធំរបស់មេគយខេត្ត គឺការនាំប្រេងគេចពន្ធចូលស្រុកតែម្តង ។
សេចក្តីរាយការណ៍ពីដែនសមុទ្របញ្ជាក់ថា បើទោះជាទំនិញគេចពន្ធលក្ខណះទ្រង់ទ្រាយធំ មានដូចជាម៉ូតូទំនើបៗ គ្រឿងសំណង់ ទំនិញចាប់ហួយ មានរត់ពន្ធ មានបង់ពន្ធនាំចូលមិនគ្រប់ មានបង់ពន្ធពីទំនិញបង់ពន្ធនាំចូលខ្ពស់មកបង់ពន្ធនាំចូលទាបរបៀបក្លែងភេទទំនិញ ករណីខ្លះទៀតទំនិញតំលៃខ្ពស់មកបង់ពន្ធជាទំនិញចាប់ហួយទៅវិញក៏ដោយ ក៏រាល់ទំនិញទាំងនេះត្រូវឆ្លងកាត់ក្រុមគយចល័តដែនសមុទ្រជាមុនសិន ទើបខាងគយទំនប់រលក គយស្ទឹងហាវ គយកែវផុស បន្តយកលុយដូចគ្នា។
ករណីអំពើពុករលួយខាងលើគួរតែមានការស៊ើបអង្កេតពីសមត្ថកិច្ចជំនាញថ្នាក់លើពិសេសអង្គភាពប្រឆាំងអំពើ
ពុករលួយ។យើងមិនអាចទាក់ទងទៅលោកទុំណូមេគយខេត្តព្រះសីហនុដើម្បីសុំការបំភ្លឺបានទេតែនឹងព្យាយាមនៅពេលក្រោយ៕
