ខេត្តស្ទឹងត្រែង ៖ ប្រជាពលរដ្ឋរស់នៅតាមបណ្ដោយផ្លូវជាតិ ពីខេត្តស្ទឹងត្រែងទៅខេត្តរតនគីរីបានរាយការណ៏ថា មានរថយន្តដឹកឈើខុសច្បាប់ធ្វើចរាចរណ៏យ៉ាងកក្រើកផ្លូវ ពីខេត្តស្ទឹងត្រែងទៅខេត្តរតនគីរីជារៀងរាល់យប់ គ្មានសមត្ថកិច្ច ជំនាញណាអើពើបង្ក្រាបឡើយ ដោយសារមានមន្ត្រីប៉ូលីសសេដ្ឋកិច្ចក្រសួងមហាផ្ទៃមួយរូបឈ្មោះ ម៉ៅ អាងអំណាច កាងរថយន្តដឹកជញ្ជូនខុសឈើច្បាប់ទាំងនេះ។
បើតាមប្រភពដដែលបានអោយដឹងថា ឈ្មួញដែលដឹកជញ្ជូនឈើរាល់យប់មានឈ្មោះ ម៉ុច ឈ្មោះ ម៉ៅ ឈ្មោះ កាំង ឈ្មោះ ហេង និងឈ្មោះ ឌុង(ជនជាតិយួន) គឺជាឈ្មួញឈើយ៉ាងសកម្មប្រចាំខេត្តស្ទឹងត្រែង ដែលដឹកជញ្ជូនឈើ ចេញពីស្រុកសៀមប៉ាង ឆ្លងកាត់ខេត្តស្ទឹងត្រែង លក់អោយឈ្មួញចាំទិញនៅស្រែពក ទឹកដីខេត្តរតនគីរី រួចដឹកបន្ត ទៅលក់នៅប្រទេសវៀតណាម តាមច្រកអន្តរជាតិអូរយ៉ាដាវ យ៉ាងគគ្រឹកគ្រេងនិងរលូន។
ប្រភពប្រាប់បន្តថា គេមិនដឹងច្បាស់ថា តើមន្ត្រីប៉ូលីសសេដ្ឋកិច្ចក្រសួងឈ្មោះម៉ៅ ដែលកាងរថយន្តដឹកឈើរូបនោះ បង់លុយឲ្យថ្នាក់លើប៉ុន្មានម៉ឺនដុល្លារនោះទេ? ទើបមានអំណាច យកស្បែកប៉ូលីស មកកាងបទល្មើសដឹកជញ្ជូនឈើយ៉ាងកក្រើក ភូមិភាគឥសាន្ត យ៉ាងព្ហើនបំផុត ដោយផ្គើនបទបញ្ជារបស់រាជរដ្ឋាភិបាលដែលបញ្ជាឲ្យមន្ត្រីជំនាញខិតខំបង្រ្កាបការកាប់បំផ្លាញព្រៃឈើ៕
