ភ្នំពេញ ៖ នៅព្រឹកថ្ងៃទី២៣ ខែឧសភា ឆ្នាំ២០១៨ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល បានព្រមានថា ក្រុមហ៊ុនរុករករ៉ែណាដែលអនុវត្តមិនបានត្រឹមត្រូវតាមលក្ខខណ្ឌ ក្រសួងនឹងដកអាជ្ញាប័ណ្ណ។ ការព្រមាននេះបានធ្វើឡើងនៅក្នុងកិច្ចប្រជុំជាមួយក្រុមហ៊ុនរុករករ៉ែនៅកម្ពុជា ប្រមាណជាង២០ក្រុមហ៊ុន ។
ឯកឧត្តម ស៊ុយ សែម បានថ្លែងថា ក្រុមហ៊ុនរុករករ៉ែមួយចំនួន បានអនុវត្តត្រឹមត្រូវតាមលក្ខខណ្ឌ និងមានក្រុមហ៊ុនខ្លះអនុវត្តមិនបានត្រឹមត្រូវតាមលក្ខខណ្ឌ។ ដូច្នេះ ឯកឧត្តម ស្នើឲ្យក្រុមហ៊ុនទាំងអស់អនុវត្តឲ្យបានត្រឹមត្រូវតាមលក្ខខណ្ឌ សំខាន់ការងារពាក់ព័ន្ធបរិស្ថាន កុំឲ្យប៉ះពាល់បរិស្ថាន និងនាំអន្តរាយដល់ប្រជាពលរដ្ឋ ហើយកាកសំណល់មានជាតិពុល ត្រូវទុកដាក់ឲ្យបានត្រឹមត្រូវ ដោយមិនត្រូវទុកពាសវាលពាសកាល ឬបង្ហូរចូលទឹកដែលពលរដ្ឋកំពុងប្រើប្រាស់នោះឡើយ ។
យោងតាមរបាយការណ៍ក្រសួងបានឲ្យដឹងថា បច្ចុប្បន្នក្រុមហ៊ុនរុករករ៉ែនៅកម្ពុជា មានប្រមាណជា៥០ក្រុមហ៊ុនដែលកំពុងដំណើរការ ហើយក្រសួងរ៉ែ និងថាមពល បានដកអាជ្ញាប័ណ្ណក្រុមហ៊ុនរុករករ៉ែប្រមាណជាង៥០ក្រុមហ៊ុនរួចមកហើយ ដែលមិនបានអនុវត្តត្រឹមត្រូវតាមលក្ខខណ្ឌរបស់ក្រសួង៕
