កោះកុង ៖ តាមសេចក្តីរាយការណ៏ពីប្រជាពលរដ្ឋបានឲ្យដឹងថា នៅថ្ងៃទី២២ ខែឧសភា ឆ្នាំ២០១៨ អង្គការសម្ព័ន្ធសត្វព្រៃហៅកាត់ថាវ៉ាយអេត បានដើរកាប់បំផ្លាញដំណាំនិងដុតផ្ទះរបស់ប្រជាជនអស់ផ្ទះ៧ខ្នង អាជ្ញាធរឃុំស្រុកមិនខ្វល់ពីពលរដ្ឋដែលត្រូវបានគេកាប់ដំណាំនិងដុតផ្ទះពួកគាត់អស់នោះទេ។ ប្រជាជនរងគ្រោះទាំងអស់នោះរស់នៅភូមិថ្មស ឃុំថ្មស ស្រុកបូទុមសាគរ ខេត្តកោះកុង ទី១ឈ្មោះ ហឿន យុត អាយុ៤៩ឆ្នាំ ២ឈ្មោះ វែន ខ្លី អាយុ៥២ឆ្នាំ ៣ឈ្មោះ តូច អាង អាយុ៥២ ៤ គ្រុយ វណ្ណៈ អាយុ៣៩ឆ្នាំ ៥ ងឹម រី អាយុ៣៨ឆ្នាំ ៦ ភន ណៃស៊ី អាយុ៥៥ឆ្នាំ ៧ ង៉ែត រ៉ា អាយុ៣៨ឆ្នាំ។
តាមសេចក្តីរាយការណ៏ឲ្យដឹងទៀតថា ប្រជាជនទាំងអស់នេះត្រូវបានអង្គការសម្ព័ន្ធសត្វព្រៃហៅថាវ៉ាយអេត បានមកគំរាមគំហែងពួកគាត់ជាច្រើនដងច្រើនសារ ប្រជាជនទាំងអស់នោះសុទ្ធតែជាអ្នកក្រីក្រ ហើយមិនមានដី បង្កបង្កើនផលទេ ទើបពួកគាត់នាំគ្នាទៅកាប់ព្រៃដីចំការចាស់របស់គាត់ដែលពួកគាត់ទុកចោលកន្លងមក ដោយសារជីវភាពខ្វះខាតពេកទើបមិនបានមកធ្វើ ឥឡូវពួកគាត់មកកាប់ឆ្ការដាំដំណាំបានផលខ្លះហើយ ស្រាប់តែមាន ក្រុមវ៉ាយអេតមកកាប់ដំណាំគាត់ចោលអស់ ហើយក្រុមអង្គការនោះបាននិយាយប្រាប់ប្រជាជនថា ដីនេះជាដីរបស់គេ ហើយជាដីឧទ្យានជាតិរបស់បរិស្ថានទេ នេះជាសម្ដីក្រុមអង្គការវ៉ាយអេតប្រាប់ប្រជាជន។
ចំណែកប្រជាជនបាននិយាយចំៗថា ពួកគាត់មកកាប់ដីធ្វើចំការបន្តិចបន្តួច ក្រុមវ៉ាយអេត មកគំរាមគំហែងហើយកាប់ដុតបំផ្លាញដំណាំពួកគាត់អស់។ ប្រជាជននិយាយចំហរថា ចុះអ្នក មានលុយមានអំណាចទិញដីព្រៃ ទិញដីភ្នំ ហើយកាប់ឈូសឆាយដីព្រៃដីភ្នំទាំងអស់នោះ មិនដែលឃើញ ក្រុមអង្គការវ៉ាយអេតទៅចាប់ទៅ ហេតុអីពលរដ្ឋធ្វើចំការដំណាំបានផលហើយមកកាប់អស់។
កន្លងមកថ្មីៗនេះ ប្រជាជនបានផ្ដឹតមេដៃជូនមេឃុំថ្មស លោក អិក គួន អោយជួយអន្តរាគមន៍ដល់ពួកគាត់ តែចុងក្រោយលោកមេឃុំប្រាប់ថា គាត់មិនហ៊ានទេ ទុកឲ្យពលរដ្ឋតវ៉ាខ្លួនឯងទៅ ហើយសុំទៅថ្នាក់ស្រុកថ្នាក់ខេត្តទៅ នេះជាសម្ដីលោក អិក កួន។
ប្រជាជនរាយការណ៏បន្តថា ពួកគាត់ទាំងអស់គ្នាដែលមានដីចំការនិងដីផ្ទះរស់នៅសព្វថ្ងៃនេះតាំងពីឆ្នាំ២០០៦មក មានដីនៅទីនោះជាង៨០គ្រួសារ គាត់ថាបើខាងអាជ្ញាធរឃុំ ស្រុក ខេត្ត មិនដោះឲ្យពួកគាត់ទេ គាត់និងនាំគ្នាទៅសាលាស្រុកនិងសាលាខេត្ត រួចពួកគាត់បន្តថានិងទៅភ្នំពេញទៀតដូចគេអែងដែរ។
អ្នកសារព័ត៍មានបានទាក់ទងអភិបាលស្រុកបូទុមសាគរលោក ទូ សាវុទ្ធ ល្ងាចថ្ងៃទី២២ ខែឧសភា ថា គាត់បានទាក់ទងទៅខាងអង្គការសម្ព័ន្ធសត្វព្រែហៅវ៉ាយអេតហើយ គាត់បន្តថា គាត់បានប្រាប់ខាងអង្គការនោះឲ្យដកចេញពីទីនោះសិន នេះជាសម្ដីលោក ទូ សាវុទ្ធ។
ប្រជាពលរដ្ឋសូមឲ្យ ខាងក្រសួងបរិស្ថានពិនិត្យមើលប្រជាជនរស់នៅចំណុចគេហៅថាគ្រួសក្រហម ក្នុងភូមិចំលងគោ ឃុំថ្មស តាំងពីឆ្នាំ២០០៦មក សូមឃ្វៀលឬកាត់ដីជូនពលរដ្ឋក្រីក្រផង។
សូមឲ្យលោកជំទាវ មិថុនា ភូថង អភិបាលខេត្តកោះកុង ដែលមានការដឹកនាំវ័យឆ្លាតចេះដឹងទុក្ខលំបាកពលរដ្ឋ ហើយដែលពលរដ្ឋនៅខេត្តកោះកុងទាំងអស់ស្រឡាញ់និងគោរពលោកជំទាវនោះ សូមលោកជំទាវរកដំណោះស្រាយជូនពលរដ្ឋឃុំថ្មសផង ពីព្រោះសម្ដេចតេជោ ហ៊ុន សែន សង្ឃឹមយ៉ាងមុតមាំទៅលើលោកជំទាវ អភិបាលខេត្ត ជាភ្នែកជាច្រមុះរបស់ សម្ដេច លោកជំទាវត្រូវតែប្រើកណ្ដាប់ដៃដែករបស់លោកជំទាវ ដែលសម្ដេចប្រទានជូន ត្រូវតែហ៊ាន វះកាត់បញ្ហាចេញ ដើម្បីពលរដ្ឋនិងសង្គមជាតិរបស់យើងឲ្យបានរីកចំរើនទៅមុខ។ដោយ យួន ឈីវ
