ភ្នំពេញ ៖ គេហទំព័ររបស់អង្គការលើកលែងទោសអន្តរជាតិ បានចុះផ្សាយកាលពីថ្ងៃទី១៤ ខែឧសភាថា អស់រយៈពេលជាង១០ឆ្នាំកន្លងមកនេះ អ្នកស្រី ទេព វន្នី បានព្យាយាមការពារសហគមន៍បឹងកក់ ដែលត្រូវបានគេបែងចែកសម្រាប់ការអភិវឌ្ឍឯកជន ដែលសំដៅដល់ទីផ្សារទេសចរណ៍។ ប៉ុន្តែស្ថានភាពនយោបាយមិនល្អនៅកម្ពុជា បានជម្រុញឲ្យបរិយាកាសដ៏អាក្រក់សម្រាប់អ្នកការពារសិទ្ធិដីធ្លី និងអ្នកស្រី ទេព វន្នី ដែលបានរងការចាប់ចងពីសំណាក់រដ្ឋាភិបាលក្នុងការងាររបស់គាត់ ។
អង្គការលើកលែងទោសអន្តរជាតិ បានអំពាវនាវទៅរដ្ឋាភិបាលកម្ពុជា ឲ្យទម្លាក់ចោលការចោទប្រកាន់ទាំងអស់ និងដោះលែងសកម្មជនដីធ្លី អ្នកស្រី ទេព វន្នី ដោយគ្មានលក្ខខណ្ឌ ។ ប៉ុន្តែលោក សុខ ឥសាន អ្នកនាំពាក្យបក្សកាន់អំណាចបានឆ្លើយតបថា លោកមិនចាប់អារម្មណ៏ចំពោះការអំពាវនាវនោះទេ ព្រោះថាបរទេសមិនមានសិទ្ធិជ្រៀតជ្រែកចូលកិច្ចការ ផ្ទៃក្នុងរបស់តុលាការប្រទេសណាមួយនោះទេ ។
សូមជម្រាបថា អ្នកស្រី ទេព វន្នី ត្រូវបានអាជ្ញាធរចាប់ខ្លួនកាលពីពាក់កណ្តាលខែសីហា ឆ្នាំ២០១៦ ចំពេលដែលអ្នកស្រីចូលរួមធ្វើយុទ្ធនាការថ្ងៃចន្ទពណ៌ខ្មៅ ដែលទាមទារឲ្យដោះលែងមន្ត្រីអាដហុក៤រូប និងមន្ត្រី គ.ជ.ប.ម្នាក់ ខណៈដែលតុលាការលើកយកសំណុំរឿងករណីហិង្សាលើសន្តិសុខខណ្ឌដូនពេញ ។
ទាក់ទិនករណីនេះលោក សុខ ឥសាន បញ្ជាក់ថា ករណីនេះវាជាឆន្ទានុសិទ្ធិឯករាជ្យរបស់តុលាការកម្ពុជា។ ដូច្នេះគ្មានជនណាដែលថា អន្តរជាតិឬមិនអន្តរជាតិ មកលូកដៃចូលកិច្ចការផ្ទៃក្នុងរបស់តុលាការប្រទេសមួយបានទេ ។ លោកថា អ្នកស្រី ទេព វន្នី ត្រូវបានតុលាការកំពូលសម្រេចឱ្យជាប់ពន្ធនាគារ២ឆ្នាំកន្លះ ពាក់ព័ន្ធនឹងសំណុំរឿងហិង្សាលើសន្តិសុខខណ្ឌដូនពេញ កាលពីឆ្នាំ២០១៣កន្លងទៅ ៕
