រាជធានីភ្នំពេញ ៖ លោក សុខ សុភ័ក្ត អនុរដ្ឋលេខាធិការក្រសួងពាណិជ្ជកម្ម បានថ្លែងក្នុងសន្និសីទសារព័ត៌មានថា ក្រសួងនឹងចាត់វិធានការច្បាប់លើបុគ្គលឬប្រព័ន្ធផ្សព្វផ្សាយណា ដែលដកស្រង់សម្តីរដ្ឋមន្ត្រីបំភ្លឺខុសពីការពិត ។ លោកថា ប្រសិនបើការបំផ្លើសមានទំហុំធំ ផលប៉ះពាល់ទៅដល់អស្ថេរភាពសង្គម ឬក៏ចលាចលនៅក្នុងសង្គម ហើយប្រសិនបើការបំផ្លើស វាមានអង្គការចាត់តាំងត្រឹមត្រូវ ដែលធ្វើឲ្យសម្រាប់តែបំផ្លើស យើងនិងចាត់វិធានការ។
ការព្រមានរបស់ក្រសួងពាណិជ្ជកម្មធ្វើឡើង បន្ទាប់ពីសង្គមហ្វេសប៊ុករិះគន់លោក ប៉ាន សូរស័ក្កិ រដ្ឋមន្ត្រីក្រសួងពាណិជ្ជកម្ម អំពីការបែងចែក អ្នកមានអ្នកក្រ ទាក់ទងការប្រើប្រាស់សាំងនាពេលកន្លងទៅ ទើបនៅថ្ងៃនេះក្រសួងពាណិជ្ជកម្ម តាមរយៈអនុរដ្ឋលេខាធិការម្នាក់បានចេញមុខមកព្រមានចាត់វិធានការច្បាប់លើបុគ្គល ដែលមានចេតនាបកស្រាយសម្តីរដ្ឋមន្ត្រីស្ថាប័ននេះខុសពីការពិត ទាក់ទងតម្លៃនៃការប្រើប្រាស់ប្រេងឥន្ធនៈនៅកម្ពុជា។
តាមស្តាប់សំដីលោក ប៉ាន សូរសក្កិ ផ្ទាល់ក្នុងវីដេអូឃ្លីបក៏គេបានឮថា លោករដ្ឋមន្ត្រីរូបនោះនិយាយថា សាំងសម្រាប់អ្នកក្រប្រើនិងសាំងសម្រាប់អ្នកមានប្រើដែរ ។ ដូច្នេះតើឲ្យពលរដ្ឋបកស្រាយយ៉ាងម៉េចបានត្រឹមត្រូវនោះ ។
ក្នុងវីដេអូឃ្លីបរបស់រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ ដែលគេចែករំលែកលើបណ្តាញសង្គមតៗគ្នាកាលពីថ្ងៃទី៩ ខែឧសភា ថា ប្រជាពលរដ្ឋភាគច្រើនដែលជិះរថយន្ត និងម៉ូតូ ខ្លះចាក់សាំងធម្មតា ខណៈសាំងស៊ុបពែសម្រាប់អ្នកមានចាក់ឡានទំនើប។ ករណីនេះលោកថា ក្រសួងយកចិត្តទុកដាក់ជួយត្រួតពិនិត្យលើសាំងធម្មតាឲ្យមានគុណភាពជូនប្រជាពលរដ្ឋក្រីក្រ៕
