រាជធានីភ្នំពេញ ៖ តាមប្រភពពីក្រសួងមហាផ្ទៃ បានអោយដឹងថា ក្មួយប្រុសបង្កើតនាយករដ្ឋមន្ត្រី គឺឧត្តមសេនីយ៍ផ្កាយ៣ ហ៊ុន ជា ត្រូវបានសមត្ថកិច្ចឃាត់ខ្លួននាំទៅធ្វើការសាកសួរនៅក្រសួងមហាផ្ទៃ តាមបញ្ជារបស់សម្ដេចនាយករដ្ឋមន្ត្រី ហើយត្រៀមនឹងបញ្ជូនទៅតុលាការ នៅរសៀលថ្ងៃពុធនេះ បន្ទាប់ពីបាញ់ប្រមាណជាង១០គ្រាប់ កាលពីយប់ម៉ិញ។
ឧត្តមសេនីយ៍ឯក ហ៊ុន ជា ត្រូវបាននាំខ្លួនទៅសួរនាំនៅក្រសួងមហាផ្ទៃ កាលពីព្រឹកថ្ងៃទី២ ខែឧសភា ឆ្នាំ២០១៨ តាមបញ្ជាសម្ដេចតេជោ ហ៊ុន សែន នាយករដ្ឋមន្ត្រី ដែលជាឪពុកមាបង្កើត។ លោក ហ៊ុន ជា ត្រូវបាននាំខ្លួនទៅសាកសួរនៅនាយកដ្ឋានព្រហ្មទណ្ឌ នៃក្រសួងមហាផ្ទៃ បន្ទាប់ពីបានបង្កការបាញ់បោះប្រមាណជាង១០គ្រាប់ កាលពីយប់ថ្ងៃអង្គារម្សិលមិញ បង្កការភ្ញាក់ផ្អើលពេញទឹកដីខណ្ឌដូនពេញ ប៉ុន្តែក៏ស្ងប់ស្ងាត់ទៅវិញ សូម្បីអាជ្ញាធរមានសមត្ថកិច្ច បានត្រឹមឈរមើលពីចម្ងាយ។ ករណីផ្ទុះអាវុធជាច្រើនគ្រាប់នេះ ផ្ដើមចេញពីជម្លោះក្នុងគ្រួសារ ធ្វើឲ្យលោក ហ៊ុន ជា ទប់កំហឹងមិនបាន ទើបបាញ់ឡើងលើជាច្រើនគ្រាប់តែម្ដង ហើយករណីនេះមិនបង្កឲ្យនរណាម្នាក់រងគ្រោះថ្នាក់នោះទេ។
សូមបញ្ជាក់ផងដែរថា កាលពីវេលាម៉ោងប្រមាណ១០៖២០នាទីយប់ថ្ងៃទី១ ខែឧសភា ឆ្នាំ២០១៨ មានករណីផ្ទុះអាវុធជាច្រើនគ្រាប់ជាប់ៗគ្នាតែម្ដង ចេញពីផ្ទះលេខ១១ បើកអាជីវកម្មវេរលុយយីហោ True Money នៅតាមបណ្ដោយផ្លូវ១០៨ កែងផ្លូវ៥១ ស្ថិតក្នុងភូមិ១១ សង្កាត់ផ្សារថ្មីទី១ ខណ្ឌដូនពេញ រាជធានីភ្នំពេញ បង្កការភ្ញាក់ផ្អើលយ៉ាងខ្លាំង ប៉ុន្តែករណីនេះ ក៏បានស្ងប់ស្ងាត់ទៅវិញភ្លាមៗផងដែរ។
គួរំលឹកផងដែរថា គ្រាន់តែនៅក្នុងមូលដ្ឋានខណ្ឌដូនពេញ ក្នុងរយៈពេលមិនដល់មួយខែផង មានករណីផ្ទុះអាវុធចំនួន៣លើក សរុបជិត៣០គ្រាប់ទៅហើយ ហើយបានបង្កឲ្យជនជាតិទួកគីម្នាក់រងរបួសផងដែរ។ ក្រៅពីខណ្ឌដូនពេញ នៅមានករណីផ្ទុះអាវុធនៅកន្លែងផ្សេងទៀត កើតឡើងនៅក្រុងភ្នំពេញ ខណៈការបោះឆ្នោតសកលនឹងឈានចូលមកដល់នៅចុងខែកក្កដា ឆ្នាំ២០១៨ ខាងមុខនេះ៕
