ខេត្តរតនគិរី ៖ ប្រភពពីប្រជាពលរដ្ឋក្នុងស្រុកអូរយ៉ាដាវ ខេត្តរតនគិរី បានឲ្យដឹងថា រយៈពេលកន្លងទៅថ្មីនេះ មានរថយន្តប្រភេទវ៉េអង និងប្រភេទយីឌុបធំៗ ដែលអាចផ្ទុកឈើបានពី៨០តោនទៅជិត១០០តោន បានសំរុកដឹកឈើចេញទៅស្រុកយួនតាមច្រកទ្វារអន្តរជាតិអូរយ៉ាដាវ ទាំងយប់ទាំងថ្ងៃ។ ឈ្មួញយួននិងឈ្មួញខ្មែរជាច្រើននាក់អាចដឹកជញ្ជូនឈើឆ្លងកាត់ច្រកទ្វារអន្តរជាតិអូរយ៉ាដាវ ចូលទៅស្រុកយួនដោយគ្មានមន្ត្រីជំនាញឬសមត្ថកិច្ចពាក់ព័ន្ធណាហ៊ានចាត់វិធានការទប់ស្កាត់នោះទេ ព្រោះឈ្មួញបានសម្របសម្រួលបង់លុយតាមការកំណត់របស់មន្ត្រីជំនាញនិងសមត្ថកិច្ចពាក់ព័ន្ធរួចទៅហើយ។
ចំណែកប្រភពពីមន្ត្រីពាក់ព័ន្ធដែលបម្រើការងារនៅច្រកទ្វារអន្តរជាតិអូរយ៉ាដាវ ស្រុកអូរយ៉ាដាវ ខេត្តរតនគិរី ក៏បានឲ្យដឹងដែរថា រយៈពេលប៉ុន្មានថ្ងៃកន្លងទៅនេះឈ្មួញដឹកឈើចេញទៅស្រុកយួនតាមរថយន្តធំៗជាច្រើនគ្រឿងចំណុះពី៨០ទៅជិត១០០តោនចេញទៅស្រុកយួនតាមច្រកទ្វារអន្តរជាតិអូរយ៉ាដាវ យ៉ាងរលូន។
ប្រភពបានឲ្យដឹងទៀតថា លោកឧត្តមសេនីយ៍ត្រី អ៊ី ចំរើន នាយប៉ុស្ដិ៍នគរបាលអន្តោប្រវេសន៍ច្រកទ្វារអន្តរជាតិអូរយ៉ាដាវ គឺជាអ្នកទទួលបានផលប្រយោជន៍ច្រើនជាងគេ ក្នុងការឃុបឃិតឲ្យឈ្មួញបន្តសកម្មភាពដឹកជញ្ជូនឈើចេញទៅស្រុកយួនយ៉ាងពេញបន្ទុក ហើយការដែលលោក អ៊ី ចំរើន ហ៊ានធ្វើអ្វីៗស្រេចតែអំពើចិត្ត គឺដោយសារអាងមានខ្នងបង្អែកយ៉ាងរឹងមាំនៅក្នុងអគ្គនាយកដ្ឋាននគរបាលអន្តោប្រវេសន៍ ក្រសួងមហាផ្ទៃ ចាំជួយការពារនិងដោះស្រាយគ្រប់ពេលវេលា។
បញ្ហានេះ ថ្នាក់ដឹកនាំក្រសួងមហាផ្ទៃ ជាពិសេសនាយឧត្តមសេនីយ៍ នេត សាវឿន អគ្គស្នងការនគរបាលជាតិ មិនគួរមើលរំលងទង្វើរបស់លោក អ៊ី ចំរើន ក្នុងការឃុបឃិតបើកដៃឲ្យឈ្មួញដឹកជញ្ជូនឈើចេញទៅស្រុកយួនយ៉ាងពេញបន្ទុកដើម្បីជាថ្នូរនឹងផលប្រយោជន៍ដែលកំពុងធ្វើឲ្យប៉ះពាល់ដល់កេរ្តិ៍ឈ្មោះស្ថាប័ននគរបាលជាតិទាំងមូលផងដែរ៕
