ខេត្តពោធិសាត់ ៖ រយៈពេលប្រមាណ៣ខែកន្លងមកនេះ មេឈ្មួញរកស៊ីឈើខុសច្បាប់ឈ្មោះ តាំង អៀង បានសម្រុកកាប់ឈើនិងដឹកជញ្ជូនឈើចេញពីស្រុកវាលវែង ខេត្តពោធិសាត់ យ៉ាងពេញបន្ទុក ហើយគ្មានមន្ត្រីជំនាញនិងសមត្ថកិច្ចពាក់ព័ន្ធណាហ៊ានប៉ះពាល់មេឈ្មួញរូបនេះឡើយ នេះបើតាមសេចក្តីរាយការណ៏របស់ប្រជាពលរដ្ឋរស់នៅក្នុងឃុំអន្លង់រាប ស្រុកវាលវែង ខេត្តពោធិ៍សាត់ ។ លោក ម៉ៅ ធនិន អភិបាលខេត្តពោធិ៍សាត់បច្ចុប្បន្ន ត្រូវមជ្ឈដ្ឋានមួយចំនួនរិះគន់ថា មិនយកចិត្តទុកដាក់បង្ក្រាបបទល្មើសព្រៃឈើដែលកំពុងកើតឡើងយ៉ាងរាលដាលនោះទេ ហើយបណ្ដោយឲ្យមេឈ្មួញ តាំង អៀង បង្កើនសកម្មភាពបំផ្លាញព្រៃឈើក្នុងស្រុកវាលវែង និងស្រុកភ្នំក្រវាញ យ៉ាងគឃ្លើន។ បើទោះបីមេឈ្មួញ តាំង អៀង បានប្រើអាជ្ញាប័ណ្ណហួសសុពលភាពរបស់ក្រុមហ៊ុនអឹមឌីអេស(MDS) ដើម្បីដឹកជញ្ជូនឈើយ៉ាងណា ក៏លោក ម៉ៅ ធនិន អភិបាលខេត្តពោធិ៍សាត់ មិនចាត់វិធានការបង្ក្រាបដែរ។ ហេតុនេះហើយទើបប្រជាពលរដ្ឋមួយចំនួនរិះគន់ថា អភិបាលខេត្តពោធិ៍សាត់ គឺជាអ្នកឃុបឃិតកាងឲ្យមានបទល្មើសបំផ្លាញព្រៃឈើដើម្បីជាថ្នូរនឹងផលប្រយោជន៍។
ព្រៃឈើនៅក្នុងតំបន់ដែនជម្រកសត្វព្រៃភ្នំឱរ៉ាល់ កំពុងប្រឈមនឹងសេចក្ដីវិនាសយ៉ាងធ្ងន់ធ្ងរព្រោះមេឈ្មួញ តាំង អៀង កំពុងបង្កើនសកម្មភាពកាប់ឈើ និងដឹកជញ្ជូនឈើចេញពីតំបន់នេះយ៉ាងគគ្រឹកគគ្រេង បើទោះបីអាជ្ញាប័ណ្ណក្រុមហ៊ុនអឹមឌីអេស របស់ឧកញ៉ា ទ្រី ភាព ដែលអួតថាឈប់រកស៊ីឈើ ហួសសុពលភាពយូរឆ្នាំមកហើយក៏ដោយ ក៏មេឈ្មួញ តាំង អៀង អាចប្រើប្រាស់អាជ្ញាប័ណ្ណនេះដើម្បីបន្តកាប់បំផ្លាញព្រៃឈើនិងដឹកជញ្ជូនឈើយ៉ាងរលូនដដែល នេះតាមប្រភពព័ត៌មានពីប្រជាពលរដ្ឋរស់នៅតាមបណ្ដាឃុំមួយចំនួនក្នុងស្រុកភ្នំក្រវាញ ខេត្តពោធិ៍សាត់ ។
ចំណែក លោក ប៉ាន់ មរកត ប្រធានមន្ទីរបរិស្ថានខេត្តពោធិ៍សាត់ក៏ដូចជាលោក ម៉ៅ ធនិន អភិបាលខេត្តពោធិ៍សាត់ និងមេរដ្ឋបាលព្រៃឈើខេត្តពោធិ៍សាត់ គឺដូចគ្នា មិនចាត់វិធានការទប់ស្កាត់បទល្មើសឡើយ ហើយកំពុងនាំគ្នារក្សាភាពស្ងៀមស្ងាត់ដើម្បីទទួលផលប្រយោជន៍ទៅវិញ។
ថ្មីៗកន្លងទៅនេះមេឈ្មួញ តាំង អៀង សម្រុកដឹកឈើប្រភេទធ្នង់និងរាជកុលចេញពីស្រុកភ្នំក្រវាញ និងស្រុកវាលវែង ចូលមករាជធានីភ្នំពេញនិងចេញទៅស្រុកយួនយ៉ាងរលូន ព្រោះមន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធដទៃទៀតគិតតែពីរឿងប្រមូលលុយដាក់ហោប៉ៅចែកគ្នាធ្វើមានធ្វើបានប៉ុណ្ណោះ បណ្តាលឲ្យព្រៃឈើនៅក្នុងតំបន់ដែនជម្រកសត្វព្រៃភ្នំសំកុស ដែនជម្រកសត្វព្រៃភ្នំឱរ៉ាល់ និងតំបន់អភិរក្សជួរភ្នំក្រវាញភាគកណ្ដាល ត្រូវប្រឈមនឹងសេចក្ដីវិនាសនាពេលឆាប់ៗខាងមុខ ចៀសមិនផុតឡើយ។ អ្វីដែលគួរកត់សម្គាល់នោះគឺលោក វេង សាខុន រដ្ឋមន្ត្រីក្រសួងកសិកម្ម និងលោក សាយ សំអាល់ រដ្ឋមន្ត្រីក្រសួងបរិស្ថាន សម្ងំស្ងៀមធ្វើមិនដឹងមិនឮអ្វីទាំងអស់ ពេលដែលព្រៃឈើក្នុងស្រុកភ្នំក្រវាញ និងស្រុកវាលវែង ខេត្តពោធិ៍សាត់ កំពុងរងការបំផ្លាញយ៉ាងមហន្តរាយ ហើយប្រសិនបើលោករដ្ឋមន្ត្រីទាំងពីរក្រសួងចាត់ការបង្រ្កាបធ្ងន់ដៃ ច្បាស់ជាមេឈ្មួញ តាំង អៀង មិនហ៊ានគឃ្លើនបំផ្លាញព្រៃឈើដូចពេលនេះទេ។
យើងពុះអាចសុំការពន្យល់ពីលោក តាំងអៀង បានទេ ព្រោះពុំមានលេខទូរសព្ទ័៕
