ភ្នំពេញ ៖ នៅថ្ងៃទី២៣ ខែមេសា ឆ្នាំ២០១៨ វេលាម៉ោង ១៥និង២៥នាទី មានក្រុមប្រជាពលរដ្ឋមកពីភូមិខ្សឹម ភូមិក្រញូងសែនជ័យ ភូមិជើងឃ្លេ មកពីឃុំ២ធ្នូ ស្រុកស្នួល ខេត្តក្រចេះ ប្រមាណជិត៣០០នាក់ បានធ្វើការដង្ហែរក្បួនដោយថ្មើរជើង
ចេញពីចំនុចក្រសួងរៀបចំដែនដី នគររូបនីយកម្ម និងសំណង់ គោលបំណងមកកាន់ខុទ្ទកាល័យ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី តែត្រូវកម្លាំងនៃអធិការដ្ឋាននគរបាលខណ្ឌដូនពេញ និងប្រជាការពារខណ្ឌ រារាំងបាននៅត្រង់ចំណុចមហាវិថីព្រះសីហនុ កែងមហាវិថីព្រះមុនីវង្ស និងបានណែនាំ សំរាយផ្លូវជូនពួកគាត់ ដោយដឹកនាំក្បួនតាមបណ្តោយមហាវិថីព្រះមុនីវង្ស បត់ចូលផ្លូវលេខ២១៤ ចូល១៩ បត់ចូល២៤០ បត់ចូលផ្លូវឧកញ្ញ៉ាស៊ូស្រ៊ុន មកដល់ខុទ្ទកាល័យសម្តេចនាយក ស្ថិតនៅខាងមុខវត្តបទុមវតី ដែលថិតនៅផ្លូវឧកញ្ញ៉ា ស៊ូស្រ៊ុន ភូមិ៣ សង្កាត់ចតុមុខ ខណ្ឌដូនពេញ នៅវេលាម៉ោង១៥និង៣០នាទី ដែលដឹកនាំដោយលោក ឱក មែន លោក រីម ជីន និងឈ្មោះ លឿង ធឿន
ក្នុងគោលបំណងដើម្បីដាក់ញ្ញត្តិ សុំអន្តរាគមន៍ពាក់ព័ន្ឋនិងក្រុមហ៊ុនចំការកៅស៊ូមេមត់ និងអាជ្ញាធរ បានបណ្តេញពួកគាត់ចេញពីដីកន្លែងប្រកបអាជីវកម្ម និង ធ្វើស្រែចំការ អាស្រ័យផលបច្ចុប្បន្ន ។
តំណាងខុទ្ទកាល័យបានទទួលញ្ញត្តិ និងបានណែនាំដល់ពួកគាត់ថា អាជ្ញាធរជាតិ និងបង្កើតគណៈកម្មការចុះស្រាវជ្រាវដល់មូលដ្ឋានផ្ទាល់ ដើម្បីធ្វើការដោះស្រាយជូនពួកគាត់ និងដោយមានការសម្របសម្រួលពីអភិបាល នៃគណៈអភិបាលរាជធានីភ្នំពេញ ក្នុងការសម្រួលមធ្យោបាយត្រឡប់ទៅខេត្តវិញ ដោយសេវាដឹកជញ្ជូនរបស់សាលារាជធានី ។ពេលនេះ ពួកគាត់កំពុងរង់ចាំរថយន្តក្រុងរបស់សាលារាជធានី ជូនពួកគាត់ត្រឡប់ទៅវិញ នៅគោលដៅខាងលើ ៕
