ភ្នំពេញ ៖នៅព្រឹកថ្ងៃទី២៣ ខែឧសភា នេះ ព្រឹទ្ធសភានិតិកាលទី៤ បានបើកសម័យប្រជុំលើកដំបូង ហើយ សម្តេចវិបុលសេនាភក្តី សាយ ឈុំ បានជាប់ជាប្រធានព្រឹទ្ធសភា សម្រាប់អាណត្តិទី៤ មួយអាណត្តិទៀត តាមរយៈនៃការបោះឆ្នោត ។
ការបើកសម័យប្រជុំលើកដំបូងនេះ ត្រូវបានធ្វើឡើងក្រោមព្រះរាជអធិបតីភាពដ៏ខ្ពង់ខ្ពស់ ព្រះកុរណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា ហើយក៏មានការចូលរួម ពីឥស្សរជនជាន់ខ្ពស់ មកពីស្ថាប័នផ្សេងទៀត ដូចជា សម្តេចពញាចក្រី ហេង សំរិន ប្រធានរដ្ឋសភា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ព្រមទាំងមន្ត្រីជាន់ខ្ពស់មួយចំនួនទៀតផងដែរ។
សូមបញ្ជាក់ថា ព្រឹទ្ធសភា មានអាណត្តិ៦ឆ្នាំ។ សមាជិកព្រឹទ្ធសភា មានចំនួន៦២រូប ដែលស្មើនឹងពាក់កណ្តាល នៃសមាជិករដ្ឋសភា។
ក្នុងកិច្ចប្រជុំនោះ ព្រះមហាក្សត្រ មានព្រះរាជបន្ទូលទៅកាន់សម័យប្រជុំ ដោយសម្តែងនូវក្តីអំណរសាទរដ៏កក់ក្តៅ ថ្វាយនិងជូនសមាជិក សមាជិកា ព្រឹទ្ធសភាអាណត្តិទី៤ ដែលពិតជារួបរួមសាមគ្គីភាពគ្នា ដើម្បីបំពេញនូវតួនាទី ក្នុងស្ថាប័ននីតិបញ្ញតិកំពូល នៃព្រះរាជាណាចក្រកម្ពុជា ធ្វើឱ្យអំណាចរដ្ឋមានតុល្យភាព និងប្រព្រឹត្តិបានល្អប្រសើរ សំដៅការពារមូលដ្ឋានគ្រឹះ នៃរដ្ឋធម្មនុញ និងគោលការណ៍នៃលទ្ធិប្រជាធិបតេយ្យ សេរីពហុបក្ស ព្រមទាំងសិទ្ធិសេរីភាព និងផលប្រយោជន៍ស្របច្បាប់របស់ប្រជាពលរដ្ឋគ្រប់ជ្ឈដ្ឋាន។
សូមបញ្ជាក់ថា ថ្នាក់ដឹកនាំនិងសមាជិកព្រឹទ្ធសភានីតិកាលទី៤ ទាំង៦២រូប នឹងអញ្ជើញធ្វើសច្ចាប្រណិធាននៅចំពោះព្រះភ័ក្ត្រព្រះ មហាក្សត្រ ព្រះភ័ក្ត្រនៃសម្តេចព្រះសង្ឃរាជ និងទេវតារក្សាស្វេតច្ឆត្រ នារសៀលថ្ងៃទី២៣ ខែមេសា ឆ្នាំ២០១៨ វេលាម៉ោង១៦រសៀល នៅក្នុងព្រះទីនាំងទេវាវិនិច្ឆ័យព្រះបរមរាជវាំង៕
