ភ្នំពេញ ៖ កាលពីថ្ងៃទី២៣ ខែឧសភា ឆ្នាំ២០១៨នេះ សម្តេចតេជោហ៊ុនសែន នាយករដ្ឋមន្ត្រី បានអញ្ជើញចូលរួមពិធីសម្ពោធ ដាក់ឲ្យដំណើរការផ្លូវការសណ្ឋាគារលំដាប់ផ្កាយ៥ « ឌឺរ៉ូយ៉ាល់សេនកោះរ៉ុង » ស្ថិតក្នុងភូមិសុខសាន្ត សង្កាត់កោះរ៉ុង ខេត្តព្រះសីហនុ។
ថ្លែងនៅកោះរ៉ុង សម្តេច ហ៊ុន សែន បានព្រមានថា នឹងដកហូតយកកោះនៅលំហរសមុទ្រប្រមាណ៣០ ពីដៃឯកជនវិញ ព្រោះតែក្រុមហ៊ុនទាំងអស់នោះមិនមានការអភិវឌ្ឍន៍ បន្ទាប់ពីរាជរដ្ឋាភិបាលបានផ្តល់សិទ្ធិឲ្យគ្រប់គ្រង ។
សម្តេច ហ៊ុន សែន បានបញ្ជាក់ថា កោះនៅកម្ពុជាទាំងអស់មិនមែនជាគោលដៅនៃការវាយប្រហារភេរវកម្មនោះទេ តែត្រូវដឹងថា កោះទាំងអស់នោះជាដីកោះរបស់រដ្ឋ មិនមែនជាកោះ ជាដីរបស់អ្នកណាឬឧកញ៉ាណាម្នាក់នោះឡើយ ។ ចំណែកកោះរ៉ុង គឺជាកោះនិងដីរបស់រដ្ឋ មិនមែនជាកោះរបស់លោកឧកញ៉ា គិត ម៉េង នោះទេ ៕
