ខេត្តសៀមរាប ៖ ថ្ងៃទី១៧ ខែមេសា ឆ្នាំ២០១៨ នៅលើដងផ្លូវជាតិលេខ៦ទាំងច្រកនៃទិសខាងកើត ចេញពីក្រុងសៀមរាបទៅខេត្តកំពង់ធំ កំពង់ចាម ឬ រាជធានីភ្នំពេញ និង ច្រកខាងលិច ចេញពីក្រុងសៀមរាប ទៅខេត្តបន្ទាយមានជ័យ គេឃើញមានលំហូរនៃយានយន្តខុសពីថ្ងៃធម្មតា ដោយសារជំនន់នៃភ្ញៀវទេសចរណ៍យ៉ាងច្រើន ហូរចូលទៅកំសាន្តក្នុងព្រឹត្តិការណ៍អង្គរសង្ក្រាន្ត រយៈពេល៤ថ្ងៃ ចាប់គិតពីថ្ងៃសុក្រ ១៣រោច ខែចែត្រ ឆ្នាំរកា នព្វស័ក ពស២៥៦១ ដល់ថ្ងៃចន្ទ ២កើត ខែពិសាខ ឆ្នាំច សំរឹទ្ធស័ក ពស ២៥៦២ ត្រូវនឹងថ្ងៃទី១៣ ដល់ថ្ងៃទី១៦ ខែមេសា គស ២០១៨ ។ បើតាមសេចក្តីរាយការណ៍របស់សមត្ថកិច្ចចរាចរណ៍ បានឲ្យដឹងថា លំហូរភ្ញៀវចេញពីការកំសាន្តអង្គរសង្ក្រាន្ត ដែលត្រូវបានវិលត្រឡប់ទៅកាន់ខេត្តផ្សេងៗវិញនោះ មួយចំនួនធំត្រូវបានចាកចេញតាំងពីយប់ថ្ងៃទី១៦ ក្រោយបញ្ចប់ព្រឹត្តិការណ៍អង្គរសង្ក្រាន្ត ។
បើទោះជាសង្ក្រាន្តឆ្នាំថ្មី ( ឆ្នាំច ពស ២៥៦២ ) ត្រូវបានប្រារព្ធឡើងយ៉ាងផុសផុសនៅតាមបណ្តាខេត្ត-ក្រុង-រាជធានី ទូទាំងប្រទេស ក៏ប៉ុន្តែត្រូវបានគេការព្យាករណ៍ទុកថា ព្រឹត្តិការណ៍អង្គរសង្ក្រាន្តឆ្នាំថី្ម ( ឆ្នាំច ) អាចនឹងមានចំនួនភ្ញៀវចូលរួម កើនលើសព្រឹត្តិការណ៍អង្គរសង្ក្រាន្តឆ្នាំរកា ឆ្នាំចាស់កន្លងទៅ ដោយសារតែការរៀបចំអង្គរសង្ក្រាន្តឆ្នាំថ្មី ស្ថិតក្នុងស្មារតីដដែល ក៏ប៉ុន្តែកម្មវិធីកំសាន្ត និងព្រឹត្តិការណ៍ត្រូវបានបង្កើនភាពអស្ចារ្យជាងឆ្នាំចាស់ ។
លំហូរភ្ញៀវទេសចរណ៍រយៈពេល៤ថ្ងៃ ចូលទៅកំសាន្តជាមួយព្រឹត្តិការណ៍អង្គរសង្ក្រាន្ត មានចំនួនសារុបប្រហែលជាង ១លាន៨សែននាក់ ក្នុងនេះភ្ញៀវទេសចរណ៍បរទេសមានចំនួន ប្រហែលជាង៣ម៉ឺននាក់ ។ បើទោះជាយ៉ាងណាក្នុងចំនួននេះ ត្រូវបានកើនលើសពីព្រឹត្តិការណ៍អង្គរសង្ក្រាន្តឆ្នាំរការ ឆ្នាំចាស់ ប្រមាណ២សែននាក់ ។
ឯកឧត្តម ថោង ខុន រដ្ឋមន្រ្តីក្រសួងទេសចរណ៍ បង្ហើបឲ្យដឹងយ៉ាងដូច្នេះ នៅយប់ថ្ងៃទី១៦ ខែមេសា នៅលើវេទិការតន្រ្តីអង្គរសង្ក្រាន្ត ទីតាំងព្រលានជល់ដំរី ដែលជាកម្មវិធីចុងក្រោយនៃព្រឹត្តិការណ៍អង្គរសង្ក្រាន្ត ។
ព្រឹត្តិការណ៍អង្គរសង្ក្រាន្ត ឆ្នាំច សំរឹទ្ធិស័ក ពុទ្ធសករាជ ២៥៦២ ត្រូវនឹងគស ២០១៨ គឺជាព្រឹត្តិការណ៍អង្គរសង្ក្រាន្តឆ្នាំទី៦ ។ ក្រសួងទេសចរណ៍បានបង្ហាញរបាយការណ៍ថា ៖ ៥ឆ្នាំចុងក្រោយនេះ ព្រឹត្តិការណ៍អង្គរសង្ក្រាន្ត បានរួមចំណែកជម្រុញកំណើនសេដ្ឋកិច្ច និងបានទាក់ទាញភ្ញៀវទេសចរជាតិ-អន្តរជាតិ ។ ព្រឹត្តិការណ៍អង្គសង្ក្រាន្តឆ្នាំដំបូង នៅក្នុងឆ្នាំ២០១៣ មានភ្ញៀវទេសចរចូលរួម ជិត ១៨ម៉ឺននាក់ ព្រឹត្តិការណ៍អង្គរសង្ក្រាន្តឆ្នាំទី២ (ឆ្នាំ២០១៤ ) ទទួលបានភ្ញៀវទេសចរចូលរួមជិត៣៩ម៉ឺននាក់ ឆ្នាំទី៣ (ឆ្នាំ២០១៥) ទទួលបានភ្ញៀវចូលរួមប្រហែល ១លាននាក់ ឆ្នាំទី៤ (ឆ្នាំ២០១៦) មានភ្ញៀវទេសចរចូលរួម ១លាន៣សែននាក់ ព្រឹត្តិការណ៍អង្គរសង្ក្រាន្តឆ្នាំទី៥ (ឆ្នាំ២០១៧) ទទួលបានភ្ញៀវចូលរួម ប្រមាណ ១លាន ៦សែននាក់ ជាមួយនឹងការធ្វើឲ្យមានចំណូល ហូរចូលចរន្តសេដ្ឋកិច្ចខេត្តសៀមរាបចំនួន ៩៥ លានដុល្លាអាមេរិក ដែលបានមកពីការចំណាយថ្លៃស្នាក់នៅ ម្ហូបអាហារ ការធ្វើដំណើរ ការចំណាយទិញវត្ថុអនុស្សាវរីយ៍ មគ្គុទ្ទេសក៍ និងការចំណាយទៅលើសេវាកម្មផ្សេងៗ ជាច្រើនទៀត ៕
