ខេត្តពោធិសាត់ ៖ ស្នងការដ្ឋាននគរបាលខេត្តពោធិសាត់ បានបើកកិច្ចប្រតិបត្តិការ ស្រាវជ្រាវនិងបង្រ្កាប តាមស្វែងរក និងឃាត់ខ្លួនមុខសញ្ញាមួយរូបដែលបានប្រព្រ្តឹត្តអំពើហិង្សាដោយចេតនា បណ្តាលឲ្យមានមនុស្សស្លាប់នៅខេត្តកណ្តាល ហើយរត់មកលាក់ខ្លួននៅភូមិបែន ឃុំលាច ស្រុកក្រវាញ ខេត្តពោធិសាត់។
ជនសង្សយ័មានឈ្មោះ ស៊ីម ជីម (ហៅមាំង) ភេទប្រុស អាយុ៣២ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិពងទឹក ឃុំដំណាក់អំពិល ស្រុកអង្គស្នួល ខេត្តកណ្តាល ជាមនុស្សមានជំងឺសសៃប្រសាទ (ត្រូវជាកូនបង្តើតជនរងគ្រោះ)។
នៅមុនពេលកើតហេតុ ជនល្មើសបានយកម៉ូតូរបស់ឪពុករបស់ខ្លួនជិះ តែឪពុកមិនព្រម ទើបជនល្មើសទាញដំបងវាយឪពុកត្រូវក្បាលបែកហូរឈាម។ ពេលនោះជនរងគ្រោះត្រូវជាម្តាយបង្កើត បានរត់មករកប្តឹងមេភូមិ ហើយត្រូវបានជនល្មើសទាញកាំបិតផ្គាក់ រត់តាមមកដល់មុខផ្ទះមេភូមិ កាប់ទៅលើជនរងគ្រោះពីក្រោយត្រូវកញ្ចឹងកនិងចិញ្ចើម០៤កាំបិតបណ្តាលឲ្យដួលផ្កាប់មុខនៅកន្លែងកើតហេតុ។ ស្របពេលនោះ មានឈ្មោះ សោម ដារ៉ូ ភេទប្រុស អាយុ២៩ឆ្នាំ អ្នកលក់ទឹក
អំពៅ រស់នៅភូមិពងទឹក ជាមួយគ្នាជិះម៉ូតូឌុបប្រពន្ធនិងកូន ពីទិសខាងត្បូងមកដល់ ជួបជនល្មើស ហើយត្រូវបានជនល្មើសដេញកាប់រត់ចោលម៉ូតូ រួចជនល្មើសលើកយកម៉ូតូ(ម៉ាក់សង់ស៊េរីឆ្នាំ២០១៨ពណ៌ខ្មៅ ជិះគេចខ្លួនទៅទិសខាងជើងបាត់ទៅ )។ ចំណែកជនរងគ្រោះត្រូវបានបងប្អូនដឹកយកទៅសង្គ្រោះដល់ពេទ្យបង្អែកស្រុកអង្គស្នួល ហើយបានស្លាប់នៅមន្ទីរពេទ្យតែម្តង។
សូមបញ្ជាក់ថា ៖ ជនល្មើសរូបនេះ ធ្លាប់ជាប់ពន្ធនាគារខេត្តកណ្តាល០៣លើករួចមកហើយ។
១.បទ ៖ ចោរកម្មលួចមាន់
២.បទ ៖ លួចអាវុធប៉ុស្តិ៍
៣.បទ ៖ អំពើហិង្សាគ្រួសារ ។
ករណីនេះ សមត្ថកិច្ចកំពុងបន្តចាត់ការតាមនីតិវិធីច្បាប់ ៕
