ភ្នំពេញ ៖នៅថ្ងៃទី២៩ ខែមីនា ឆ្នាំ២០១៨ លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាក់ប្រាប់បណ្តាញព័ត៌មានក្នុងស្រុកថា គ្មានការពន្យាការបោះឆ្នោតជ្រើសតាំងតំណាងរាស្ត្រអាណត្តិទី៦ នៅកម្ពុជានោះទេ ហើយការបោះឆ្នោតនឹងធ្វើឡើងតាមកាលកំណត់ ។
ការអះអាងរបស់ គ.ជ.ប ខាងលើ បន្ទាប៉ពីលោកស្រី មូរ សុខហួរ អតីតអនុប្រធាន អតីតគណបក្សសង្គ្រោះជាតិ បានធ្វើបទសម្ភាសន៍មួយជាមួយវិទ្យុអាស៊ីសេរី ហើយបានលើកឡើងថា ក្រុមប្រឆាំងរបស់លោកស្រី នឹងទាមទារឱ្យមានការពន្យារពេលការបោះឆ្នោត បើសិនណាជាអតីតគណបក្សប្រឆាំង មិនបានចូលរួមក្នុងការបោះឆ្នោតជាតិ នៅចុងខែកក្កដាខាងមុខនេះ។ លោកស្រីក៏បានទទូចឱ្យប្រទេសកាណាដា ចូលរួមដាក់សម្ពាធចំពោះរដ្ឋាភិបាលកម្ពុជាផងដែរ។
អ្នកនាំពាក្យ គ.ជ.ប បានបញ្ជាក់ថា ការបោះឆ្នោតខាងមុខនេះគ្មានការប្រែប្រួលនោះទេ ហើយ គ.ជ.ប នឹងធ្វើទៅតាមច្បាប់របស់ប្រទេសកម្ពុជា មិនធ្វើតាមបរទេសណាឡើយ។ ស្ថាប័ន គ.ជ.ប បម្រើតែផលប្រយោជន៍ប្រជាពលរដ្ឋខ្មែរប៉ុណ្ណោះ។
សូមជម្រាបថា ការបោះឆ្នោតជ្រើសតាំងតំណាងរាស្ត្រអាណត្តិទី៦ ត្រូវបានប្រកាសដោយរាជរដ្ឋាភិបាលកម្ពុជា ដែលកំណត់យកថ្ងៃអាទិត្យ ទី២៩ ខែកក្កដា ឆ្នាំ២០១៨ ខាងមុខនេះ ៕
