ខេត្តស្ទឹងត្រែង ៖ សមត្ថកិច្ចបានចុះនិងបង្ក្រាបបានរថយន្តសាំងយ៉ុងដឹកឈើចំនួន៦គ្រឿង និងម៉ូតូដឹកឈើជាង១០គ្រឿង កាលពីវេលាយប់ឈានចូលថ្ងៃទី២៣ ខែមីនា ឆ្នាំ២០១៨ នៅក្នុងសង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង ដែលអាចចាត់ទុកជាប្រតិបត្តិការទ្រង់ទ្រាយធំមួយ ដែលប្រជាពលរដ្ឋមិនដែលឃើញ។
ប្រជាពលរដ្ឋនិយាយថា ទើបតែឃើញសមត្ថកិច្ចឃាត់ និងបង្ក្រាបទ្រង់ទ្រាយធំជាលើកទី១ ខណៈដែលរថយន្តដឹកឈើខាងលើ បានដឹកចេញពីម្ដុំភូមិអូរស្វាយ ឬចំណុចព្រៃចាស់ ដុងកាចែម ស្ទើរតែរាល់ថ្ងៃ មិនលោះសោះឡើយ ហើយមានរាប់ឆ្នាំហើយគ្មានការបង្ក្រាបនោះទេ ។ ម្យ៉ាងទៀតរថយន្តដឹកឈើទាំងនោះបានបង្កឲ្យមានការភិតភ័យដល់ប្រជាពលរដ្ឋ ដែលធ្វើដំណើរនៅលើដងផ្លូវជាតិ ឬអាចជួបគ្រោះថ្នាក់ចរាចរណ៍ដោយយថាហេតុ ដោយសាតែរថយន្តដឹកឈើទាំងអស់នេះ បើកបរក្នុងល្បឿនយ៉ាងលឿនដូចចុះថាននរក៕
