បាត់ដំបង ៖ កម្លាំងអន្តរាគមន៍បង្ការបង្ក្រាបនៃស្នងការដ្ឋាននគរបាលខេត្តបាត់ដំបង បានចុះប្រតិបតិ្តការបង្ក្រាបទីតាំងល្បែងស៊ីសង អាប៉ោងបៀ ខុសច្បាប់១កន្លែង ឃាត់ខ្លួនមនុស្សចំនួន១៣នាក់ និងវត្ថុតាងមួយចំនួន។
លោក ឈឿង គឹមសុង មេក្រុមបង្ការបង្ក្រាបនិងជានាយរងការិយាល័យនគរបាលព្រហ្មទណ្ឌកំរិតស្រាលបានប្រាប់អោយដឹងថា ក្នុងកិច្ចប្រតិបត្តិការខាងលើនេះបានធ្វើឡើងកាលពីរសៀលថ្ងៃទី២១ ខែមីនា ឆ្នាំ២០១៨ នៅចំណុចភូមិបល្ល័ង សង្កាត់វត្តគរ ក្រុងបាត់ដំបង។
ក្នុងការបង្ក្រាបបទល្មើសជាក់ស្ដែងជាលទ្ធផល សមត្ថកិច្ចជំនាញបានឃាត់ខ្លួនមនុស្សចំនួន១៣នាក់។ វត្ថុតាងដកហូតរួមមាន ៖ - គ្រាប់អាប៉ោងចំនួន៣គ្រាប់ -ចាននិងគំរបអាប៉ោង១ឈុត -បៀ ១ហ៊ូ - កម្រាលសម្រាប់ចាក់អាប៉ោងចំនួន១
-ម៉ូតូចំនួន៤គ្រឿង។
លោកឧត្តមសេនីយ៍ត្រី ជេត វណ្ណនី ស្នងការរងទទួលផែននគរបាលកណ្ដាលយុត្តិធម៌បានប្រាប់អោយដឹងថា ៖ ជនសង្ស័យជាអ្នកញៀនលេងល្បែងស៊ីសងខាងលើរួមនិងវត្ថុតាងត្រូវបានឃាត់នៅការិយាល័យនគរបាលព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តបាត់ដំបងដើម្បីធ្វើការសាកសួរបន្ថែមនិងកសាងសំណុំរឿងបញ្ជូនបន្តទៅតុលាការនៅថ្ងៃទី២២ ខែមីនា ឆ្នាំ២០១៨ ដើម្បីចាត់ការតាមនីតិវិធី៕
