ខេត្តស្ទឹងត្រែង ៖ កាលពីរសៀលថ្ងៃទី១៧ ខែមីនា ឆ្នាំ២០១៨ កម្លាំងសមត្ថកិច្ចបានរឹបអូសឈើអាដោយម៉ាស៊ីនរណាយន្ត
ប្រភេទឈើលេខ២ ប្រមាណជាង៣០ម៉ែត្រគូប ស្ថិតនៅភូមិស្រឡៅ ឃុំអន្លុងជ្រៃ ស្រុកថាឡាបរិវ៉ាត់ ខេត្រស្ទឹងត្រែង។
យោងតាមការអោយដឹងពីមន្ត្រីនគរបាលប្រឆាំងបទល្មើសសេដ្ឋកិច្ចខេត្តថា ប្រជាពលរដ្ឋបានរាយការណ៍ថា គំនរឈើអារាប់រយកន្ទុយត្រូវបានលួចស្តុកនៅទីតាំងចំការស្វាយចន្ទីមួយកន្លែង ស្ថិតនៅភូមិស្រឡៅ។ ប្រភពដដែលបន្តថាក្រោយពីទទួលបានព័ត៌មានខាងលើ កម្លាំងសមត្ថកិច្ចបានចុះពិនិត្យដល់ទីតាំង ទើបរាយការណ៍ជូនថ្នាក់ដឹកនាំចុះធ្វើការរឹបអូសតែម្តង។
ជាក់ស្តែងក្រោយការពិនិត្យលើវត្ថុតាងបទល្មើស ជំនាញបានសម្រេចធ្វើការរឹបអូសដោយប្រើប្រាស់រថយន្តក្នុងការដឹកជញ្ជូនទៅរក្សាទុកជាសម្បត្តិរដ្ឋ ដែលជាការប៉ាន់ស្មានដំបូងអាចក្នុងកម្រិតប្រមាណជាង៣០ម៉ែត្រគូប។
ប្រភពព័ត៌មានអោយដឹងថា ឈើអាទាំងនោះត្រូវគេប្រើប្រាស់ម៉ាស៊ីនរណាយន្ត រួចដឹកជញ្ជូនចេញមួយចំនួនមកស្តុកទុកនៅ តំបន់ភូមិសាស្ត្រស្រុកថាឡាបរិវ៉ាត់ ក្នុងគោលដៅរកមធ្យោបាយដើម្បីដឹកជញ្ជូនបន្តទៅខេត្តព្រៃវែង និងស្វាយរៀង។
បើតាមការបញ្ជាក់ពីជំនាញរដ្ឋបាលព្រៃឈើនិងកម្លាំងគរបាលប្រឆាំងបទល្មើសសេដ្ឋកិច្ចថា មកទល់ម៉ោងប្រមាណជាង៧យប់ទៅហើយ កម្លាំងកម្មករមិនទាន់ប្រមូលអស់នៅឡើយទេ តែយ៉ាងណាកម្លាំងសមត្ថកិច្ចបន្តយាមកាមរហូតទល់ព្រឹកប្រសិនជាដឹកមិនអស់៕
