ខេត្តសៀមរាប ៖ ប្រជាពលរដ្ឋក្នុងភូមិវាល សង្កាត់ជ្រាវ ក្រុងសៀមរាប ខេត្តសៀមរាបបានរិះគន់យ៉ាងខ្លាំងទៅលើមន្ត្រីជំនាញដែលបឹទភ្នែកបណ្ដោយឲ្យឈ្មួញឈ្មោះ ហាក់ សេង យកគ្រឿងចក្រឈូសឆាយ ទន្ទ្រានកាន់កាប់ដីព្រៃលិចទឹក នៅចំណុចថ្លុកតាពេញ ភូមិវាល សង្កាត់ជ្រាវ ស្រេចតែអំពើចិត្ត ដោយមានការបង្ហោះតាមបណ្ដាញសារព័ត៌មាន គេហទំព័រ បណ្ដាញទំនាក់ទំនងសង្គម រិះគន់យ៉ាងពេញទំហឹងទៅលើមន្រ្ដីជំនាញ ។
ក្រោយពីមានការរិះគន់មក សមត្ថកិច្ចចម្រុះបានចុះទៅឃាត់គ្រឿងចក្រចំនួន៩គ្រឿង ជារបស់លោក ហាក់ សេង នៅនិងកន្លែងកើតមានបទល្មើសដោយផ្ទាល់តែម្តង បញ្ហាទាំងនេះត្រូវបានប្រជាពលរដ្ឋតាមដានដោយយកចិត្តទុកដាក់ និងរង់ចាំមើលថាតើ ច្បាប់ហ៊ានចាត់វិធានការចំពោះឈ្មួញឈ្មោះ ហាក់ សេង នេះដែរឬទេ? និងមានប្រសិទ្ធភាពយ៉ាងណា?។
តាមប្រភពពត័មានពីប្រជាពលរដ្ឋនិងមន្ត្រីជំនាញបានអោយដឹងថា ឈ្មួញឈ្មោះ ហាក់ សេង បានឈូសឆាយបំផ្លាញ ព្រៃលិចទឹកអស់ប្រមាណ១ហិកតារួចជាស្រេចទៅហើយ ដោយម្ចាស់គ្រឿងចក្របានជួលឲ្យអ្នកបើកបរឈូសឆាយ បំផ្លាញព្រៃលិចទឹកនោះ ត្រូវបានគេដឹងថាជាអ្នកលក់គ្រឿងបន្លាស់រថយន្តនៅក្បែរភោជនីយដ្ឋាន ឡុក យីញ ក្នុងក្រុងសៀមរាប ហើយឈ្មួញម្នាក់នេះអាចមានទំនាក់ទំនងជិតស្និទ្ធជាមួយមន្ត្រីអាជ្ញាធរមូលដ្ឋានគ្រប់លំដាប់ថ្នាក់ ទើបហ៊ានប្រើគ្រឿងចក្រ ឈូសឆាយដីព្រៃលិចទឹកដោយគ្មានញញើតអ្វីទាំងអស់។
ចំណែក លោក នួន មុន្នី ប្រធានមន្ទីរបរិស្ថានខេត្តសៀមរាប បានថ្លែងប្រាប់បណ្តាញពត័មាននៅព្រឹកថ្ងៃទី ១៦ ខែមីនា ថា៖ ករណីលោក ហាក់ សេង ឈូសឆាយព្រៃលិចទឹកជម្រកត្រីពងកូន នៅតំបន់ ៣ ស្ថិតក្នុងភូមិវាល សង្កាត់ជ្រាវ ក្រុង-ខេត្តសៀមរាប រហូតមកដល់ពេលថ្ងៃនេះ លោកមិនទាន់ឃើញបញ្ជួនមកនោះទេ ចាប់តាំងពីជំនាញបានផ្អាកការ ឈូសឆាយ កាលពីព្រឹកថ្ងៃទី១៣ ខែមីនា កន្លងមក។ សូមបញ្ជាក់ថា ករណីខាងលើនេះលោក សូ ប្លាតុង បានប្រាប់បណ្តាញពត័មានថា បានប្រគល់អោយជំនាញបរិស្ថានធ្វើការដោះស្រាយ ដោយឡែកលោក នួន មុន្នី ប្រធានមន្ទីរបរិស្ថានបានបញ្ជាក់ថា ករណីនេះមិនត្រូវរុញដាក់គ្នានោះទេ ជំនាញពាក់ព័ន្ធទាំងអស់ ត្រូវរួមគ្នាធ្វើការដោះស្រាយ ហើយករណីនេះក៍មិនទាន់មានលទ្ធផលនោះដែរ ព្រោះលោកមិនទាន់ឃើញ ឯកសារពាក់ព័ន្ធមួយណាបញ្ជួនមកមន្ទីរបរិស្ថានលោកឡើយ។
បញ្ហានេះអ្នកសារពត័មានយើងមិនទាន់ទទួលបានការបកស្រាយបំភ្លឺពីលោក ហាក់ សេង បាននៅឡើយទេ ជុំវិញការចោទប្រកាន់នេះ ដោយសារគ្មានលេខទូស័ព្ទ តែនិងព្យាយាមតាមដានពត័មាននេះបន្តទៀត៕
