ភ្នំពេញ ៖ ក្រសួងព័ត៌មានបានចេញនូវសេចក្តីជូនដំណឹងមួយដោយបានបញ្ជាក់ថា កម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលគណៈកម្មការទន្លេមេគង្គ លើកទី៣ និងកម្មវិធី សន្និសិទអន្តរជាតិ ចាប់ពីថ្ងៃ០២-០៥រោច ខែចែត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០២ -០៥ ខែមេសា ឆ្នាំ២០១៨ នៅក្រុងសៀមរាប ខេត្តសៀមរាប ក្រោមប្រធានបទស្តីពី ទន្លេមេគង្គតែមួយ ស្មារតីតែមួយ ៖ ការលើកកម្ពស់កិច្ចខិតខំប្រឹងប្រែងរួមគ្នា និងភាពជាដៃគូរ ដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាពក្នុងអាងទន្លេមេគង្គ ដែលមានវត្តមាន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាប្រធានដឹកនាំកិច្ចប្រជុំកំពូលនេះ និងមានការអញ្ជើញចូលរួមពីប្រមុខរដ្ឋាភិបាលនៃបណ្តាប្រទេសជាសមាជិក នៃគណៈកម្មការទន្លេមេគង្គ ។
អាស្រ័យហេតុនេះ ប្រសិនបើអ្នកសារព័ត៌មានជាតិ និងអន្តរជាតិដែលមានបំណងចូលរួម យកព័ត៌មានក្នុងកិច្ចប្រជុំកំពូលនេះ ក្រសួងចាប់បើកទទួលពាក្យសុំចុះឈ្មោះចាប់ពីថ្ងៃជូនដំណឹង រហូតដល់ថ្ងៃទី២៦ ខែមិនា ឆ្នាំ២០១៨ នៅអគ្គនាយកដ្ឋានព័ត៌មាន និងសោតទស្សន៍ ឬអាចទាញ យកពាក្យចុះឈ្មោះ ដើម្បីបំពេញតាមគេហទំព័រ www.inb.gov.kh ៕
