ខេត្តរតនគិរី ៖ កាលពីវេលាម៉ោង១២,៣០នាទី ថ្ងៃទី១៨ មីនា ២០១៨ សមត្ថកិច្ចនគរបាលខេត្តរតនគីរី បានដោះលែងអ្នកកាសែត៤នាក់ដែលត្រូវបានឃាត់ខ្លួន កាលពីថ្ងៃទី១៧ ខែមិនា ឆ្នាំ២០១៨ នោះវិញហើយ បន្ទាប់ពីបានឲ្យពួកគេធ្វើកិច្ចសន្យាលែងប្រព្រឹត្តអំពើល្មើសច្បាប់បន្តទៀត ។
អ្នកកាសែត៤នាក់ ត្រូវបានអធិការនគរបាលស្រុកវើនសៃឃាត់ខ្លួន ពាក់ព័ន្ធករណីចាប់ជំរិតទារប្រាក់ចំនួន២លានរៀល ពីពលរដ្ឋជាថ្នូរនឹងការចាប់ម៉ាស៊ីនកាត់ឈើ នៅល្ងាចថ្ងៃសៅរ៏ ទី១៧ ខែមីនា ឆ្នាំ២០១៨ ខណៈពួកគាត់កំពុងអារឈើក្នុងចម្ការ ស្ថិតក្នុងឃុំកោះពាក់ ស្រុកវើនសៃ ដើម្បីយកមកធ្វើផ្ទះ ហើយសមត្ថកិច្ចបានទទួលបណ្តឹងពីពលរដ្ឋទើបឃាត់ខ្លួន។
អនុវត្តតាមបទបញ្ជារបស់លោកប្រធានគណៈបញ្ជាការឯកភាពខេត្ត និងសម្របសម្រួលដោយលោកព្រះរាជអាជ្ញា បានចាត់កម្លាំងចម្រុះ ដឹកនាំដោយលោកអភិបាលរងស្រុកវើនសៃ បានចុះទៅនាំខ្លួនអ្នកកាសែតទាំង៤នាក់ មកអធិការដ្ឋានដើម្បីសាកសួរបំភ្លឺ។
អ្នកកាសែតទាំង៤នាក់ ដែលពាក់ព័ន្ធរឿងជំរិតទារប្រាក់២លានរៀលពីពលរដ្ឋខាងលើរួមមាន ទី១- ឈ្មោះ សេង ឌីវ៉ាន់ សាព័ត៌មានមហានគរអច្ឆរិយៈ ទី២- ឈ្មោះ ផាន ផន ទូរទស្សន៍រស្មីបូព៌ា ទី៣- ឈ្មោះ សន ចាន់ឌី ទូរទស្សន៍អនឡាញរស្មីបូព៌ា ទី៤- ឈ្មោះ ឡេត ឡី សារព័ត៌មានសង្គមកម្ពុជា។
ព្រឹកថ្ងៃអាទិត្យទី១៨ ខែមីនា ឆ្នាំ២០១៨ អធិការនគរបាលស្រុកវើនសៃ បានបញ្ជូនអ្នកទាំង៤មកកាន់ស្នងការដ្ឋាននគរបាលខេត្តដើម្បីសាកសួរបន្ត។ក្នុងចំណោម៤នាក់នោះ មានម្នាក់ឈ្មោះ សេង ឌីវ៉ាន់ ជាអ្នកបង្ខំទារប្រាក់២លានរៀលពីពលរដ្ឋដោយផ្ទាល់។
កាលពីវេលាម៉ោង១២នឹង៣០នាទីថៃ្ងត្រង់ថ្ងៃទី១៨ ខែមីនា ឆ្នាំ២០១៨ ក្រោយធ្វើការសាកសួរចប់ បានធ្វើការណែនាំនិងធ្វើកិច្ចសន្យា ឲ្យវិលត្រឡប់ទៅផ្ទះវិញ បន្ទាប់ពីបានឯកភាពការអនុញ្ញាតពីលោកអភិបាលខេត្ត និងលោកព្រះរាជអាជ្ញាផងដែរ៕
