កោះកុង ៖ ដីនៅវត្តបូទុមគឺរីហៅវត្តតាអុក ស្ថិតនៅភូមិប្រទាល ឃុំអណ្ដូងទឹក ស្រុកបូទុមសាគរ ខេត្តកោះកុង ត្រូវបានលោក សន យ៉ាន មេប៉េអឹមស្រុកបូទុមសាគរ កាយយកអាចម៏ដីលក់ បណ្តាលឲ្យមានប្រតិកម្មពីប្រជាពលរដ្ឋចំណុះជើងវត្ត។
ដីដែលលោក សន យ៉ាន រំលោភកាយយកអាចម៏ដីទៅលក់នោះ ស្ថិតនៅក្នុងភូមិប្រទាល ឃុំអណ្ដូងទឹក ស្រុកបូទុមសាគរ ខេត្តកោះកុង ហើយប្រជាពលរដ្ឋបានអះអាងថា គឺជាដីរបស់វត្តបូទុមគឺរី ហៅវត្តតាអុក ដែលមានអាយុកាលរាប់រយឆ្នាំមកហើយ។
លោក សន យ៉ាន មេប៉េអឹមស្រុកបូទុមសាគរបាននិយាយថា ដីនេះម្ដាយក្មេកមេភូមិប្រទាលឈ្មោះ ខន ឡាន់ ជាអ្នកលក់ដីឲ្យ ទើបគាត់ហ៊ានកាយយកអាចម៍ដីទៅលក់។
ចំណែកម្ចាស់ដីឈ្មោះ ខន ឡាន់ ត្រូវជាម្ដាយក្មេករបស់ឈ្មោះ សោម សុផាន ដែលជាមេភូមិប្រទាល អ្នកសារព័ត៍មានបានចុះទៅយករួបភាព ហើយសួរនាំពីរឿងដីធ្លីនេះ គាត់បានជេរស្ដីឲ្យអ្នក សារព័ត៍មានយ៉ាងចាស់ដៃហើយហាមមិនឲ្យថតរូបភាពទៀត។
រីឯប្រជាពលរដ្ឋដែលរស់នៅជិតវត្តនេះចំនួន៣ភូមិ គឺ១ភូមិតាមាឃ ២ភូមិប្រទាល ៣ភូមិតាអុក បានឲ្យដឹងថា ពួកគាត់បានរស់នៅតាំងពីឆ្នាំ១៩៧៩មក ហើយក៍បានទៅធ្វើបុណ្យទាននៅវត្តជារៀងរាល់អាទិត្យ រាល់ខែ តាមប្រពៃណីខ្មែរ ពីមុនមករហូតមិនដែលឃើញអ្នកណាហ៊ានមកកាប់ឬកាយដីភ្នំវត្តនេះទេ ទើបតែចុងឆ្នាំ២០១៦នេះ មានឈ្មោះ ខន ឡាន់ មកកាប់ឆ្ការព្រៃហើយធ្វើរបងពទ្ធ័យកដីមកដល់ជាប់វត្តប្រហែល២ម៉ែត្រ ហើយយកដីភ្នំនេះមួយចំហៀងភ្នំទៀត កាយយកដីលក់ក្នុងមួយឡាន៤០០០រៀល។
ចំណែកព្រះចៅអធិការព្រះនាម ដែ គុណដើង មានសង្ឃដិការថា ព្រះអង្គទើបតែឡើងជាព្រះចៅអធិការក្រោយទេ តែព្រះអង្គបានប្រាប់ទៅគណ:កម្មការអាចារ្យវត្ត និងថ្នាក់ឃុំស្រុកដែរ តែស្ថាត់ឈឹងទៅ។
តាមសម្ដីលោកបង ពេញ ដែលជាចៅអធិការចាស់ ធ្លាប់បួសនៅវត្តនេះតាំងពីឆ្នាំ១៩៩២មក គាត់ថាមិនដែលមានអ្នកហ៊ានកាប់ដីភ្នំវត្តនេះទេគឺនៅទាំងអស់ ។
ចំណែកប្រជាពលរដ្ឋបានបន្ដថា ពួកគាត់បានប្រាប់មេភូមិ មេឃុំ ជាច្រើនដងច្រើនសារហើយ តែមិនឃើញមានវិធានការណាមួយទេ ពលរដ្ឋបន្ដថាពួកគាត់អស់សង្ឃឹមទៅថ្នាក់ឃុំថ្នាក់ស្រុកហើយ។
ចំណែក លោក ឃៀង យិង មេឃុំអណ្ដូងទឹក អ្នកសារព័ត៍មានទូរសព្ទ័ទៅសួរការកាយដីភ្នំដីវត្ត គាត់បានប្រាប់ថា ប្រជាពលរដ្ឋបានតេទៅគាត់ជាច្រើននាក់ដែរ តឺគាត់ជាប់រវល់ពេកមិនបានចុះមកទេ មេឃុំបន្តថា រឿងកាយដីនេះគាត់មិនមានពាក្យបណ្ដឹងពីអ្នកណាមួយទៅដល់ដៃគាត់ទេ នេះជាសម្ដីមេឃុំអណ្ដូងទឹក។
អ្នកសារព័ត៍មានបានទូរសព្ទ័ទៅលោក ទូ សាវុទ្ធ អភិបាលស្រុកបូទុមសាគរ លោកបានប្រាប់ថា ចាំលោកតេទៅមេឃុំ ហើយឲ្យចុះទៅមើល បើកាយដីភ្នំឬដីវត្តមែន លោកនិងធ្វើការហាមឃាត់មិនឲ្យកាយទៀតទេ។
ចំណែក លោក ពេជ្រ ស៊ីយ៉ុន ប្រធានមន្ទីររ៉ែថាមពលខេត្តកោះកុង បានប្រាប់តាមទូរសព្ទ័ថា លោកទៅប្រជុំនៅភ្នំពេញ ចាំមកវិញ លោកចុះមកចាប់បើមិនមានច្បាប់អនុញាត្តិ។
ប្រជាពលរដ្ឋរិះគន់ថា សម្ដីមេឃុំ ចៅហ្វាយស្រុក ប្រធានមន្ទីរ ជាពាក្យដោះសារយកតែរួចរួចខ្លួន មួយឆ្លើយដាក់មួយ មិនចេះខ្មាស់គេ ធ្វើការងារបំរើរាស្រ្ត ស៊ីប្រាក់ខែរាស្រ្ត បែជាមិនគឹតដល់ទុក្ខលំបាករបស់ពលរដ្ឋ ហើយមិនគឹតដល់ សម្បត្តិរបស់រដ្ឋទេ ទុកឲ្យជនខិលខូច មានលុយមានអំណាចធ្វើតាមចិត្ត មេឃុំ ចៅហ្វាយស្រុក ប្រធានមន្ទីរ ប្រហែលមាន លាភសក្ការ:ពីអ្នករកស៊ីឡានដឹកដីហើយមើលទៅ ទើបមិនហ៊ានក្អកទេខ្លាចបាត់លុយ។
សម្ដេច ហ៊ុន សែន មានប្រសាសន៍ថា មន្រ្តីទាំងអស់កុំធ្វើមន្រ្តីជើង២ ត្រូវធ្វើមន្រ្តីជើង១០ តែផ្ទុយទៅវិញ មេឃុំ ចៅហ្វាយស្រុក ប្រធានមន្ទី បែរជាផ្គើននិងអនុសាសន៍នាយករដ្ឋមន្រ្តីទៅវិញ។
កន្លងមក លោក ឧិម យិនទៀង ប្រធានអង្គភាពប្រឆំាងអំពើពុករលួយបានលើកឡើងថា មន្រ្តីដែលមិនធ្វើកាបំរើពលរដ្ឋឲ្យបានល្អ ហើយមិនការពារសម្បត្តិរដ្ឋ គឺត្រូវតែ វះកាត់ចេញ មិនទុកទេ បើទុកនិងខូចកេរ្តិ៏ឈ្មោះដល់ថ្នាក់ដឹកនាំដែលលោកខំធ្វើល្អ៕ ដោយ យួន ឈីវ
