ខេត្តបន្ទាយមានជ័យ ៖ ប្រភពព័តមានពីបញ្តាញព័តមានក្នុងស្រុកបានផ្សាយស្តីពីការ បែកធ្លាយ លិខិតលោក ឆែ សុធា ប្រធានសាខាគយខេត្តបន្ទាយមានជ័យ កើតនៅថ្ងៃទី១០ធ្នូ ឆ្នាំ១៩៥៧ រហូតមកដល់ថ្ងៃនេះ លោក ឆែ សុធា មានយុបាន៦១ឆ្នាំហើយ ដែលត្រូវចូលនិវត្តន៍ តែលោក ឆែ សុធា នៅស្រណោះកៅអីខ្លាញ់ មិនចង់ចូលនិវត្តន៏នោះទេ នៅក្រាញននៀលសុំសម្តេចហ៊ុនសែនពន្យាពេល១ឆ្នាំទៀត។
លិខិត១ច្បាប់ដែលលោក ឆែ សុធា ប្រធានសាខាគយនិងរដ្ឋាករខេត្តបន្ទាយមានជ័យ បានសរសេរផ្ញើជូនសម្តេចតេជោ ហ៊ុនសែន មានខ្លឹមសារថា លោកសូមគោរពជូន សម្តេចតេជោ ហ៊ុនសែន នាយករដ្ឋមន្ត្រីនៃប្រទេសកម្ពុជា សំណើសុំពន្យាអាណត្តិបម្រើការងាររយ:ពេល១ឆ្នាំបន្តទៀត ចាប់ពីថ្ងៃទី១១ធ្នូ ឆ្នាំ២០១៧ រហូតដល់ថ្ងៃទី១១ធ្នូ ឆ្នាំ២០១៨ ។លិខិតនេះបានរៀបរាប់ថា សព្វថ្ងៃនេះខ្ញុំបាទបានបម្រើការងារជាប្រធានសាខាគយនិងរដ្ឋាករខេត្តបន្ទាយមានជ័យ និងបានខិតខំបម្រើជាតិមាតុភូមិ ទទួលបានសមិទ្ធផលសំខាន់ៗដូចជា ចាប់ពីខែធ្នូ ឆ្នាំ២០១៥ កន្លងមក ខ្ញុំបាទបានខិតខំអនុវត្តយុទ្ធសាស្ត្រកៀងគរចំណូលរបស់រាជរដ្ឋាភិបាល ដោយធ្វើឲ្យចំណូលពន្ធគយនៅខេត្តបន្ទាយមានជ័យ មានការកើនឡើងគួរជាទីមោទន: និងថែមទាំងបានបង្ការនិងបង្ក្រាបនូវរាល់បាតុភាពអសកម្មនានា ដែលធ្លាប់កើតមានកន្លងមកដោយជនឆ្លៀតឱកាសមួយចំនួន។ខ្ញុំបាទ ជាអនុប្រធានគណ:ពង្រឹងស្រុកមង្គលបូរី និងជាប្រធានគណ:ពង្រឹងឃុំឬស្សីក្រោកចំនួន១៧ភូមិ ស្រុកមង្គលបូរី ខេត្តបន្ទាយមានជ័យ លើសពីនេះទៀត ខ្ញុំបាទក៏ជាអនុប្រធានគណ:ពង្រឹងឃុំព្រែកកំពឹស ១៧ភូមិ ស្រុកខ្សាច់កណ្តាល ខេត្តកណ្តាល ផងដែរ។ ហេតុនេះ លោកបានសុំអនុញ្ញាតិ្តបាននៅបម្រើការងារបន្តទៀតដោយក្តីអនុគ្រោះ ។ បន្ទាយមានជ័យថ្ងៃទី៣០ តុលា ឆ្នាំ២០១៧ ។លើលិខិតនោះ សម្តេចនាយករដ្ឋមន្ត្រីបានចារជូនឯកឧត្តម គុណ ញឹម ស្នើរក្សាទុករហូតក្រោយបោះឆ្នោត២០១៨ ដើម្បីគ្រប់គ្រង ដោយពេលនេះជាករណីពិសេស។
សូមបញ្ជាក់ថា លោកឆែ សុធា ធ្លាប់ជាមន្ត្រី ជាថ្នាក់ដឹកនាំសាខាគយខេត្តមួយចំនួន ហើយចុងក្រោយបានមកធ្វើជាប្រធានសាខាគយខេត្តបន្ទាយមានជ័យ កាលពីខែធ្នូឆ្នាំ២០១៥កន្លងមកនេះ រួចត្រូវចូលនិវត្តន៍នៅថ្ងៃទី១១ធ្នូ ឆ្នាំ២០១៧ តាមច្បាប់ស្តីពីសហលក្ខន្តិក:មន្ត្រីរាជការស៊ីវិល។
តាមប្រភពព័តមានពីអាជីវករបានឲ្យដឹងថា លោក ឆែ សុធា កាន់ជាប្រធានសាខាគយនិងរដ្ឋករខេត្តបន្ទាយជ័យនេះ មានអាកប្បកិរយាក្រអឺតក្រទម សំដីសំដៅមិនសូវរាបទាប ចង្អៀតចង្អល់ខ្លាំងណាស់ ជាពិសេសលោក ឆែ សុធា បង្កើតប៉ុស្តគយជាច្រើនកន្លែងនៅតាមផ្លូវជាតិ ជំរិតទារលុយពីអាជីវករដឹកទំនិញដែលបានបង់ពន្ធឲ្យគយច្រករួចហើយ។
សារព័តមានយើងពុំអាចសុំបំភ្លឺទាក់ទិនការសុំពន្យាពេលនិវត្តន៏ពីលោក ឆែ សុធា បានឡើយព្រោះពុំមានលេខទូរសព្ទ័៕
