ខេត្តកោះកុង ៖ នាព្រឹកថ្ងៃទី៣ ខែមិនា ឆ្នាំ២០១៨ នៅឃុំអណ្តូងទឹក ស្រុកបុទុមសាគរ ខេត្តកោះកុងដើម្បីចងចាំនិងរំលឹកគុណដល់វិរៈភាពស្នេហាជាតិរបស់ ឯកឩត្តម ព្រឹទ្ធាចារ្យ សាយ ភូថង។ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា បានអញ្ជើញជាអធិបតីដ៏ខ្ពង់ខ្ពស់ សម្ភោធវិថីនិងស្តូបរូបសំណាក ឯកឩត្តម ព្រឹទ្ធាចារ្យ សាយ ភូថង អតីតឩត្តមទីប្រឹក្សា ព្រះមហាក្សត្រនៃព្រះរាជាណាចក្រកម្ពុជា។ ក្នុងពិធីដ៏មហោឡារឹកនេះ មានការអញ្ជើញចូលរួមពីសំណាក់ឯកឩត្តម លោកជំទាវ លោក លោកស្រី ប្រធាន អនុប្រធានមន្ទីរ អង្គភាពនានា ជុំវិញខេត្ត និងកងកម្លាំងប្រដាប់អាវុធទាំងបីប្រភេទ។
ក្នុងឧកាសនោះ លោកជំទាវ មិថុនា ភូថង អភិបាលខេត្តកោះកុង បានថ្លែងថា រូបសំណាកឯកឩត្តម ព្រឹទ្ធាចារ្យ សាយ ភូថង បានចាប់ផ្តើមកសាងនៅថ្ងៃទី៣ ខែសីហា ឆ្នាំ២០១៧ និងបានរួចរាល់ជាស្ថាពរនៅថ្ងៃទី១៥ ខែកុម្ភះ ឆ្នាំ ២០១៨ ដោយចំណាយអស់ថវិការចំនួន៨០០០០ដុល្លារ និងបានចំណាយអស់ថវិការចំនួន៣៥០០០០ដុល្លារ ដើម្បីកសាងចេតីយ៍សំរាប់តំកល់ធាតុ ។
លោកជំទាវបានបន្តទៀតថា វិថី សាយ ភូថង មានប្រវែង៦៨គីឡូម៉ែត្រនិងទទឹង២៣ម៉ែត្រ គិតចាប់ពីរូបសំណាកដែលស្ថិតក្នុងភូមិជីមាល ឃុំអណ្តូងទឹក ស្រុកបុទុមសាគរ រហូតដល់ចំនុចកូនកុក ក្នុងភូមិកៀនក្រឡាញ់ ឃុំភ្ញីមាស ស្រុកគិរីសាគរ ខេត្តកោះកុង ដោយបានកសាងចាប់តាំងពីឆ្នាំ២០០៨ ដោយក្រុមហ៊ុន ញូញៀន ឌីវឺលុបមែនគ្រុប និងបញ្ជប់ជាស្ថាពរនៅ ដើមឆ្នាំ២០១៥ និងបានចំណាយអស់ថវិកាសរុបចំនួន១៥៣លានដុល្លារសហរដ្ឋអាមេរិក ដើម្បីជាការតបស្នងគុណបការៈដ៏ថ្លៃថ្លារបស់ឯកឩត្តម ព្រឹទ្ធាចារ្យ សាយ ភូថង ដែលបានបូជាកម្លាំងកាយចិត្តជូន ជាតិមាតុភូមិមិនចេះនឿយហត់ ។
ឯកឩត្តម ព្រឹទ្ធាចារ្យ សាយ ភូថង បានចំណាយពេលវេលាស្ទើរមួយជីវិត ដើម្បីបុព្វហេតុជាតិ មាតុភូមិ ដើម្បីបុព្វហេតុ គណបក្សប្រជាជនកម្ពុជា ដោយចាប់ផ្តើមពីការដឹកនាំចលនាខ្មែរឥស្សរៈ ក្នុងខេត្តកោះកុង នៅវត្តភូមិដូង ឃុំតាតៃក្រោម តំបន់ត្រពាំងរូង ចាប់តាំងពីអំឡុងឆ្នាំ១៩៤៨មកម្លេះ បើទោះបីជាឯកឩត្តម ព្រឹទ្ធាចារ្យ សាយ ភូថង បានទទួលមរណភាព ទៅហើយក្តី ប៉ុន្តែវីរភាពគំរូដឹកនាំការតស៊ូរំដោះជាតិ របស់ឯកឩត្តម ព្រឹទ្ធាចារ្យ នៅតែស្ថិតក្នុងដួងចិត្ត ប្រជាពលរដ្ឋខ្មែរជានិរន្ត ។គួររំលឹកថា ឯកឩត្តម ព្រឹទ្ធាចារ្យ សាយ ភូថង បានកើតនៅថ្ងៃទី១៧ ខែកក្កដា ឆ្នាំ១៩២០ និងទ ទួលមណរភាព នៅថ្ងៃទី១៣ ខែមិថុនា ឆ្នាំ២០១៦ ហើយប្រជាពលរដ្ឋខ្មែរទូទាំងប្រទេស ចងចាំជានិច្ចនូវស្នាដៃនិងគុណូបការៈដ៏ធំធេងរបស់ឯកឧត្តម ព្រឹទ្ធាចារ្យជានិច្ច។ ដោយយួនឈីវ
