ភ្នំពេញ ៖ តាមរយៈលិខិតមួយពីទីស្តីការគណៈរដ្ឋមន្ត្រី ផ្ញើទៅកាន់រដ្ឋមន្ត្រីក្រសួងបរិស្ថាន រាជរដ្ឋាភិបាលកម្ពុជា បានសម្រេចឲ្យផ្អាកជាបណ្តោះអាសន្ន នូវការដឹកជញ្ជូនឈើចេញពីតំបន់ស្តារអាង នៃការដ្ឋានវារីអគ្គិសនីសេសានក្រោម២ រហូតដល់បោះឆ្នោតរួច។
លិខិតដែលចុះហត្ថលេខាដោយរដ្ឋលេខាធិការទីស្តីការគណៈរដ្ឋមន្ត្រី លោក ប៊ុន អ៊ុយ បានបញ្ជាក់ថា រាជរដ្ឋាភិបាលបានសម្រេចយល់ព្រមផ្អាកជាបណ្តោះអាសន្ន នូវការចេញលិខិតអនុញ្ញាតដឹកជញ្ជូនផល អនុផលព្រៃឈើ ពីការសម្អាតអាងស្តុកទឹកគម្រោងវារីអគ្គិសនីសេសានក្រោម២ និងការឈូសឆាយសម្អាតទីតាំងគម្រោងវិនិយោគសម្បទានដីសេដ្ឋកិច្ច រហូតដល់ក្រោយការបោះឆ្នោតសាកលខាងមុខ។
សូមបញ្ជាក់ថា ការយល់ព្រមនេះ គឺធ្វើឡើងក្រោយពីក្រសួងបរិស្ថាន កាលពីថ្ងៃទី២១ ខែកុម្ភៈ បានផ្ញើលិខិតមួយច្បាប់ទៅកាន់រាជរដ្ឋាភិបាល ហើយក៏ទទួលបានចំណារឯកភាពពីសម្តេចនាយករដ្ឋមន្ត្រី នៅថ្ងៃទី២៣ ខែកុម្ភៈ ឆ្នាំ២០១៨៕
