ឧត្តរមានជ័យ ៖ យ៉ាងហោចណាស់ក៏មានប្រជាពលរដ្ឋប្រមាណ៥០នាក់ ដែលបាននាំគ្នាតវ៉ាឡោមព័ទ្ធគ្រឿងចក្ររបស់អាជ្ញាធរ ស្រុកអន្លង់វែង ខេត្តឧត្តរមានជ័យ ដើម្បីការពារផលប្រយោជន៍របស់ពួកគេនៅកន្លែងនោះ។
តាមគេហទំព័ររបស់អគ្គស្នងការដ្ឋាននគរបាលជាតិបានឲ្យដឹងថា អាជ្ញាធរស្រុកអន្លង់វែងបានឈូសឆាយដីនៅឃុំអន្លង់វែង ស្រុកអន្លង់វែង ដើម្បីធ្វើផ្លូវ រៀបចំដីទុកចែកឲ្យប្រជាពលរដ្ឋក្រីក្រនៅចំណុចជប់ត្រកួន។
ប៉ុន្តែនៅពេលដែលកំពុងឈូសឆាយនោះ ត្រូវប្រជាពលរដ្ឋដែលរស់នៅទីនោះប្រមាណ៥០នាក់ឡោមព័ទ្ធគ្រឿងចក្រ ដោយទាមទារឲ្យរក្សាដីរបស់ពួកគាត់ដដែល ឬឲ្យអាជ្ញាធរប្រគល់ដី៣ហិកតាវិញ បើប៉ះពាល់ដីពួកគាត់រស់នៅបច្ចុប្បន្ន។ ក្រោយពេលមានការសម្រួលគ្នា ពលរដ្ឋទាំងនោះក៏ព្រមត្រលប់ទៅផ្ទះវិញ ។ ចំណែកដំណោះស្រាយយ៉ាងណានោះ មិនទាន់ដឹងនៅឡើយទេ ដោយរង់ចាំការសម្រេចពីថ្នាក់លើសិន៕
