កោះកុង ៖ សមត្ថកិច្ចនគរបាលក្រុងខេមរៈភូមិន្ទ បានចុះបង្ក្រាបទីតាំងដាំដើមកញ្ឆាស្រស់ចំនួន២កន្លែងផ្សេងគ្នា ដែលមានទីតាំងនៅចំណុចឡក្រោម ស្ថិតក្នុងភូមិព្រែកស្វាយ សង្កាត់ស្ទឹងវែង ក្រុងខេមរៈភូមិន្ទ ខេត្តកោះកុង ។
ប្រតិបត្តិការខាងលើបានធ្វើឡើងនៅវេលាម៉ោងជាង១០ព្រឹកនាថ្ងៃទី១២ ខែកុម្ភះ ឆ្នាំ២០១៨ ក្រោមបទបញ្ជារបស់លោក ហេង លាង អធិការក្រុងខេមរៈភូមិន្ទ និងដោយមានការដឹកនាំផ្ទាល់ពីលោក ង៉ែត សុវណ្ណារ៉ា អធិការរងក្រុងខេមរៈភូមិន្ទ ។
នៅរសៀលថ្ងៃដដែលលោក ហេង លាង អធិការក្រុងខេមរភូមិន្ទ បានថ្លែងអោយដឹងថា ក្នុងប្រតិបត្តិខាងលើ កម្លាំងសមត្ថកិច្ចនគរបាលក្រុងបានរកឃើញវត្ថុតាងដើមកញ្ឆាស្រស់ចំនួន៣៤ដើម ស្មើនិង១៦ថូ ដែលយកចេញពីផ្ទះចំនួន២ខ្នង ផ្ទះទី១មានម្ចាស់ឈ្មោះ ជិត វ៉ាន់ឆៃ ភេទប្រុស អាយុ៣៧ឆ្នាំ និងទី២ឈ្មោះ នូ លៀម ភេទប្រុស អាយុ៥២ឆ្នាំ អ្នកទាំង២មានទីលំនៅក្នុងភូមិព្រែកស្វាយ សង្កាត់ស្ទឹងវែង ក្រុងខេមរៈភូមិន្ទ ខេត្តកោះកុង ។
ប្រភពដដែលបានបន្តថា ចំពោះជនសង្ស័យដែលបានដាំដើមកញ្ឆាស្រស់ខាងលើ កម្លាំងនគរបាលក្រុងខេមរភូមិន្ទបានធ្វើការណែនាំ និងអោយធ្វើកិច្ចសន្យាមិនអោយមានការដាំដើមកញ្ឆានេះទៀតនោះទេ បើសិនជាពួកគាត់នៅតែរឹងទទឹងហ៊ានលួចដាំទៀតនោះ កម្លាំងសមត្ថកិច្ចនិងអនុវត្តន៏ទៅតាមផ្លូវច្បាប់ជាក់ជាមិនខាន ។
ចំពោះវត្ថុតាងដើមកញ្ឆាស្រស់ចំនួន៣៤ដើមនោះ កម្លាំងជំនាញនិងធ្វើការដុតបំផ្លាញចោល ៕ ដោយយួនឈីវ
