ភ្នំពេញ ៖ សមត្ថកិច្ចនគរបាលរាជធានីភ្នំពេញ បានឃាត់ខ្លួនជនជាតិចិនចំនួន១១នាក់ កាលពីវេលាម៉ោង៩និង៣០នាទីព្រឹកថ្ងៃទី១១ ខែកុម្ភៈ ឆ្នាំ២០១៨ សង្ស័យពាក់ព័ន្ធករណីប្លន់កាលពីជិត១ឆ្នាំមុន នៅក្នុងហាងលក់សៀវភៅ បណ្តាលឲ្យជនជាតិខ្មែរម្នាក់ស្លាប់នៅនិងកន្លែង ។
ការឃាត់ខ្លួននេះធ្វើឡើង បន្ទាប់ពីកម្លាំងនគរបាលខណ្ឌពោធិ៍សែនជ័យធ្វើការល្បាត សង្ស័យលើជនជាតិចិន២នាក់កំពុងជិះម៉ូតូ ហៅឆែកឆេរមើលរកឃើញកាំភ្លើងខ្លី១ដើមម៉ាក៥៩នៅក្នុងកាបូបស្ពាយ ស្ថិតមុខច្រកចូលបុរីញូថោន ភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
មន្ត្រីនគរបាលបានបញ្ជាក់ថា ជនជាតិចិនដែលឃាត់ខ្លួនកាលពីយប់ឈ្មោះ Dai Xun ភេទប្រុសអាយុ៣៧ឆ្នាំ កាន់លិខិតឆ្លងដែន EA926438 និងឈ្មោះ Pu yijiang ភេទប្រុស អាយុ៣០ឆ្នាំ គ្មានលិខិតឆ្លងដែន កាន់អាវុធខ្លី១ដើមម៉ាក៥៩ ។ អ្នកទាំងពីរស្នាក់ផ្ទះជួលក្នុងបុរីញូថោន កន្លែងកើតហេតុ។ ចំណែក៩នាក់ទៀត ដែលកម្លាំងបន្តស្រាវជ្រាវឃាត់ខ្លួននោះ មិនទាន់ស្គាល់អត្តសញ្ញាណនោះទេ ៕
