ខេត្តកំពង់ធំ ៖ ប្រភពពីប្រជាពលរដ្ឋដែលប្រកបរបរនេសាទជាលក្ខណៈគ្រួសារ ក្នុងឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ បានឲ្យដឹងថា លោក យ៉ាន់ វិសាក់ នាយផ្នែករដ្ឋបាលជលផលផាត់សណ្ដាយ បានឃុបឃិតឲ្យមានបទល្មើសនេសាទប្រើឧបករណ៍ខុសច្បាប់កើតឡើងយ៉ាងរាលដាល ដើម្បីជាថ្នូរនឹងលាភសក្ការៈ។ ប្រភពពីមន្ត្រីមន្ទីរកសិកម្មខេត្តកំពង់ធំមួយចំនួនបានឲ្យដឹងដែរថា ការដែលលោក យ៉ាន់ វិសាក់ ហ៊ានធ្វើអ្វីៗស្រេចតែអំពើចិត្ត គឺមានការឃុបឃិតបើកដៃពីសំណាក់លោក ប៉ែន វណ្ណរឹទ្ធ នាយខណ្ឌរដ្ឋបាលជលផលខេត្តកំពង់ធំ និងលោក ធីវ វណ្ណធី ប្រធានមន្ទីរកសិកម្មខេត្តកំពង់ធំ។ ចំណែកលោក សុខ លូ អភិបាលខេត្តកំពង់ធំ បែជានៅស្ងៀមមិនចាត់វិធានការទប់ស្កាត់បទល្មើសនេសាទប្រកបដោយប្រសិទ្ធភាព ឲ្យស្របទៅតាមបទបញ្ជារបស់ថ្នាក់ដឹកនាំក្រសួងមហាផ្ទៃ ដែលដាក់ចេញកាលពីពេលថ្មីៗកន្លងទៅនេះទេ។
ប្រជានេសាទក្នុងឃុំពាមបាង ស្រុកស្ទោង ខេត្តកំពង់ធំ ក៏បានរាយកាណ៏ឲ្យដឹងដែរថា បច្ចុប្បន្នបទល្មើសនេសាទប្រើឧបករណ៍ខុសច្បាប់ក្នុងមូលដ្ឋានពួកគាត់នៅតែកើតឡើងយ៉ាងរាលដាលព្រោះលោក ហួន ផល នាយសង្កាត់រដ្ឋបាលជលផលពាមបាង គិតតែពីរឿងប្រយោជន៏សួនតួ ប្រមូលលុយញាត់ហោប៉ៅយ់ាងរំភើយ។ ប្រភពបានឲ្យដឹងទៀតថា លោក ហួន ផល នាយសង្កាត់រដ្ឋបាលជលផលពាមបាង ដែលមានការឃុបឃិតបើកដៃពីសំណាក់លោក យ៉ាន់ វិសាក់ ហៅសែ នាយផ្នែករដ្ឋបាលជលផលផាត់សណ្ដាយ និងលោក ប៉ែន វណ្ណរឹទ្ធ នាយខណ្ឌរដ្ឋបាលជលផលខេត្តកំពង់ធំ កំពុងសប្បាយប្រមូលលុយពីបទល្មើសនេសាទប្រើឧបករណ៍ខុសច្បាប់ក្នុងឃុំពាមបាង យ៉ាងរលូន ហេតុនេះហើយទើបក្រុមជនល្មើសប្រើឧបករណ៍ខុសច្បាប់ដូចជា របាំងសាច់អួនក្រឡាញឹក និងឆ្នុកភ្លើងពណ៌ជាដើម នៅតែអាចធ្វើសកម្មភាពបំផ្លាញធនធានមច្ឆជាតិក្នុងបឹងទន្លេសាបឲ្យវិនាសអន្តរាយ។
ប្រជាពលរដ្ឋនិងប្រជានេសាទក្នុងខេត្តកំពង់ធំបានអះអាងថា ករណីបទល្មើសនេសាទប្រើឧបករណ៍ខុសច្បាប់ក្នុងតំបន់បឹងទន្លេសាបនៃស្រុកកំពង់ស្វាយ និងស្រុកស្ទោង ខេត្តកំពង់ធំ គឺជារឿងដដែលៗ ហើយមិនឃើញ លោក សុខ លូ អភិបាលខេត្តកំពង់ធំ និងលោក អេង ជាសាន អគ្គនាយករដ្ឋបាលជលផល ក្រសួងកសិកម្ម ចាត់វិធានការទប់ស្កាត់នោះទេ ទោះបីជាមានបទបញ្ជារបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឲ្យមូលដ្ឋានខិតខំទប់ស្កាត់បទល្មើសនេសាទក្តី។ ប្រជានេសាទរិះគន់ថា ប្រហែលលោក សុខ លូ អភិបាលខេត្តកំពង់ធំ និងលោក អេង ជាសាន អគ្គនាយករដ្ឋបាលជលផល ទំនងទទួលបានផលប្រយោជន៍ពីបទល្មើសនេសាទក្នុងតំបន់បឹងទន្លេសាប ខេត្តកំពង់ធំ យ៉ាងសុខស្រួលផងដែរ ទើបបណ្ដោយឲ្យបទល្មើសនេសាទកើតឡើងយ៉ាងអាណាធិបតេយ្យដូច្នេះ?។ ថ្នាក់ដឹកនាំក្រសួងមហាផ្ទៃ មិនគួរមើលរំលងភាពអសកម្មនិងអំពើពុករលួយរបស់មន្ត្រីអាជ្ញាធរខេត្តកំពង់ធំ និងមន្ត្រីរដ្ឋបាលជលផលក្នុងខេត្តកំពង់ធំនោះទេ ក្នុងខណៈដែលបទល្មើសនេសាទប្រើឧបករណ៍ខុសច្បាប់ក្នុងឃុំផាត់សណ្ដាយ ស្រុកកំពង់ស្វាយ និងឃុំពាមបាង ស្រុកស្ទោង ក៏ដូចជានៅតំបន់ព្រំប្រទល់រវាងខេត្តកំពង់ធំ និងខេត្តសៀមរាប កំពុងកើតឡើងពេញបន្ទុកនោះ។
