មណ្ឌលគិរី ៖ គួរអោយសោកសង្រែង មនុស្ស២នាក់បានស្លាប់ភ្លាមៗក្នុងភ្នក់ភ្លើង និងរបួសធ្ងន់៣នាក់ បណ្តាលមកពីករណីអគ្គិភ័យលេបត្របាក់ផ្សារសែនមនោរម្យ ខេត្តមណ្ឌលគីរី នៅថ្ងៃទី១០ ខែកុម្ភៈ ឆ្នាំ២០១៨ វេលាម៉ោង២ និង២០នាទី រំលងអាធ្រាត្រ។ ផ្សារសែនមនោរម្យ ខេត្តមណ្ឌលគិរី មានតូបក្នុងផ្សារសរុប២៧៩តូប ត្រូវឆេះអស់ប្រហែល២២០តូប។
លោកឧត្តមសេនីយ៍ទោ អ៊ុក សំណាង ស្នងការខេត្តមណ្ឌលគិរីបានឲ្យដឹងថា ជនរងគ្រោះដែលស្លាប់រួមមានទី១ឈ្មោះ សេង ម៉ូ ភេទប្រុស អាយុ២៤ឆ្នាំ ជនជាតិខ្មែរ និងឈ្មោះ ទូច ណាវីន ភេទប្រុស អាយុ១៣ឆ្នាំ ជនជាតិខ្មែរ ចំណែកអ្នករបួសមានឈ្មោះ ងូវ ពិសី ភេទស្រី អាយុ២៣ឆ្នាំ ជនជាតិខ្មែរ ឈ្មោះ ម៉ក់ សេងវ៉ុន ភេទប្រុស អាយុ៥២ឆ្នាំ ជនជាតិខ្មែរ និងឈ្មោះ ម៉ក់ សុភក្ត្រ័ ភេទប្រុស អាយុ១៨ឆ្នាំ។
សាកសពមនុស្សនៅក្នុងភ្លើងឆេះនេះ សល់តែឆ្អឹង រីឯអ្នករបួសបញ្ជូនទៅព្យាបាលនៅមណ្ឌលសុខភាពខេត្តមណ្ឌលគិរី ប៉ុន្តែទំហំនៃការខូចខាតមិនទាន់ដឹងនៅឡើយទេ ចំណែកមូលហេតុវិញ កម្លាំងជំនាញកំពុងស្រាវជ្រាវ មិនទាន់អាចសន្និដ្ឋានបានទេ៕
