កំពង់ស្ពឺ ៖ ស្ត្រីដែលបានយកស្បែកជើងគប់ទៅលើរូបសម្តេច ហ៊ុន សែន នាយករដ្ឋមន្ត្រីនៃប្រទេសកម្ពុជា ត្រូវបានសមត្ថកិច្ចបញ្ជូនទៅកាន់ពន្ធនាគារខេត្តកំពង់ស្ពឺ កាលពីថ្ងៃទី៩ កុម្ភៈ ឆ្នាំ២០១៨។
មន្ដ្រីនគរបាលជាន់ខ្ពស់ បានបញ្ជាក់ថា ជនជាប់ចោទដែលមានឈ្មោះ សំ សុខា ត្រូវបានចាប់ខ្លួនក្នុងទឹកដីកម្ពុជា ក្រោយពេលដែលជននេះ ត្រូវអាជ្ញាធរថៃបណ្តេញចេញពីទឹកដីរបស់ខ្លួនកាលពីល្ងាចថ្ងៃទី៨ កុម្ភៈ ។
ការចាប់ខ្លួនស្ដ្រីរូបនេះត្រូវបានធ្វើឡើង ក្រោយលោក ស៊ឹង វុទ្ធី ចៅក្រមស៊ើបសួរសាលាដំបូងខេត្តកំពង់ស្ពឺ បានចេញដីកាបង្គ្រាបឲ្យចាប់ខ្លួន នៅថ្ងៃទី២៧ ខែមិថុនា ឆ្នាំ២០១៧កន្លងទៅ ដោយដីកានេះបញ្ជាក់ថា ស្ដ្រីឈ្មោះ សំ សុខា អាយុ៣៨ឆ្នាំ ត្រូវបានដាក់ស្ថិតក្រោមការពិនិត្យពីបទ «ញុះញង់ឲ្យមានការរើសអើង និង ជេរប្រមាថ» ប្រព្រឹត្តទៅនៅភូមិអុង ឃុំរាម ស្រុកព្រៃនប់ ខេត្តព្រះសីហនុ កាលពីថ្ងៃទី០១ ខែមេសា ឆ្នាំ២០១៧ នៅចំណុចផ្លូវលេខ៤៥ ចន្លោះគីឡូម៉ែត្រលេខ ៤-៥ ស្ថិតនៅភូមិអុង ឃុំរាម ស្រុកព្រៃនប់ ខេត្តព្រះសីហនុ ៕
