ខេត្តកោះកុង ៖ នាព្រឹកថ្ងៃទី៦ ខែកុម្ភះ ឆ្នាំ២០១៨ នៅសាលប្រជុំសាលាខេត្តកោះកុង បានបើកសន្និសិទសារព័ត៌មានមួយពាក់ព័ន្ធនិងករណីបូបខ្សាច់ចាក់បំពេញដីមួយកន្លែង ដែលស្ថិតនៅចំនុចភូមិបឹងការឆាង ក្នុងសង្កាត់ស្ទឹងវែង ក្រុងខេមរភូមិន្ទ ខេត្តកោះកុង ។លោក សុខ សុន្ទី អភិបាលរងខេត្តកោះកុង បានថ្លែងប្រាប់បណ្តាញសារព័ត៌មានថា ដីដែលឈ្មួញ ចាក់បំពេញនោះ គឺជាដីគ្រប់គ្រងដោយសហគមន៏ នេះបើយោងទៅតាមអនុក្រិតលេខ១៧៩អនក្រ បានបង្ហាញដីខាងលើជាដីដែលយើងអាចប្រើប្រាស់បាន តែដោយសារម្ចាស់ដីខាងលើមិនបានសុំច្បាប់ដើម្បីចាក់បំពេញដីរបស់ខ្លួនពីសំណាក់អាជ្ញាធរ ក៏ដូចជាក្រសួងស្ថាប័នពាក់ព័ន្ធនានា។
លោកបន្តថា បន្ទាប់ពីទទួលបានព័ត៌មាននេះភ្លាម ខាងរដ្ឋបាលខេត្តបានបញ្ជាអោយមន្ទីរពាក់ព័ន្ធទាំងអស់ចុះទៅធ្វើការហាមឃាត់ ហើយម៉្យាងវិញទៀតចំពោះដីនេះ បើសិនជាម្ចាស់ដីចង់ប្រើប្រាស់អោយស្របតាមនិតិវិធី គឺតម្រូវអោយគាត់ធ្វើការសុំច្បាប់ពីក្រសួងបរិស្ថានជាមុនសិន ។
ប្រភពដដែលបានអោយដឹងទៀតថា ចំពោះទំហំដីនិងម្ចាស់ដីពិតប្រាកដខាងរដ្ឋបាលនៅមិនទាន់បានដឹងច្បាស់នៅឡើយនោះទេ ព្រោះពេលនេះរដ្ឋបាលខេត្តបានបង្កើតក្រុមការងារមួយចុះទៅសិក្សាស្រាវជ្រាវ តាំងពីទំហុំដី ហើយនិងសិក្សាថាតើតម្រូវអោយមានបែបបទអ្វីខ្លះដើម្បីងាយស្រួលដល់ការសុំច្បាប់។
គួររំលឹកថា ចំពោះដីដែលឈ្មួញកំពុងបំពានបូបខ្សាច់ចាក់បំពេញនេះ គឺមានតាំងពីជំនាន់ឯកឩត្តម យុទ្ធ ភូថង មកម្លេះ តែការរំលោភបំពាននោះត្រូវបានបរាជ័យ ទើបតែពេលថ្មីៗនេះ ក៏ស្រាប់តែមានឈ្មួញមកបំពានយកដី នៅចំនុចដដែលនេះម្តងទៀតដើម្បីធ្វើជាកម្មសិទ្ធិផ្ទាល់ខ្លួន ហើយប្រជាពលរដ្ឋជាច្រើនកំពុងរង់ចាំមើលថា តើអាជ្ញាធរក៏ដូចជាមន្ទីរពាក់ព័ន្ធនានា អាចនិងទប់ស្កាត់នូវការរំលោភបំពាននេះបានទៀតដែរឬយ៉ាងណា ៕ដោយ យួន ឈីវ
