ខេត្តមណ្ឌលគិរី ៖ នៅរសៀលថ្ងៃទី០៤ ខែកុម្ភៈ មនុស្សចំនួន៦នាក់ ត្រូវបានគេនាំយកទៅកាន់សាលាដំបូងខេត្តមណ្ឌលគិរី ដើម្បីបន្តនីតិវិធី។ លោកឧត្តមសេនីយ៍ត្រី សូ សុវណ្ណ ស្នងការរងនគរបាលខេត្តមណ្ឌលគិរី បានថ្លែងថា ក្រោយបញ្ចប់ការសួរចម្លើយ ជនសង្ស័យត្រូវបានបញ្ជូនភ្លាមៗទៅកាន់សាលាដំបូងខេត្ត នៅរសៀលថ្ងៃទី៤ ខែកុម្ភៈ ដើម្បីជម្រះក្តីនូវអំពើឧក្រិដ្ឋដែលពួកគេបានប្រព្រឹត្ត។
លោក ម៉ម វ៉ាន់ដា អ្នកនាំពាក្យព្រះរាជអាជ្ញាខេត្តមណ្ឌលគិរី បានថ្លែងប្រាប់បណ្តាញព័ត៌មានក្នុងស្រុកថា តុលាការបានចាប់ផ្តើមសាកសួរជនសង្ស័យទាំងនោះហើយ បន្ទាប់ពីបានបញ្ជូនមកដល់តុលាការ។ តែការសាកសួរនៅមិនទាន់បញ្ចប់ទេ ដោយនៅបន្តធ្វើការសាកសួរទៀតនៅថ្ងៃនេះ។
ជនសង្ស័យទាំង៦នាក់ដែលត្រូវឃាត់ខ្លួននោះ មាន ១.ឈ្មោះ ផល ពេញ ជានាយនគរបាលប៉ុស្តិ៍អូររលែ ត្រូវបានចាប់ខ្លួននៅថ្ងៃទី២ ខែកុម្ភៈ នៅខេត្តត្បូងឃ្មុំ, ២.ឈ្មោះ កើត វេហា ហៅឆៃ ជាទាហានការពារព្រំដែន នៅវរៈសេនាតូចលេខ១០៣ ត្រូវចាប់ខ្លួនពេលចូលសារភាពនាយប់ថ្ងៃទី៣១ ខែមករា, ៣.ឈ្មោះ កើត វេតា ជាទាហានការពារព្រំដែន, ៤.ឈ្មោះ ឡាយ សាវី ជាទាហានការពារព្រំដែន, ៥.ឈ្មោះ ទន់ ធារ៉ា ជាមន្ត្រីនគរបាលប៉ុស្តិ៍អូររលែ អ្នកទាំង៣ត្រូវចាប់ខ្លួននៅយប់ថ្ងៃទី១ កុម្ភៈ និង ៦.ឈ្មោះ ឈាង វ៉ាន់និត ប្អូនថ្លៃ ផល ពេញ ត្រូវចាប់ខ្លួននៅរសៀលថ្ងៃទី២ កុម្ភៈ។
គួររំលឹកថា កាលពីវេលាម៉ោងប្រមាណ៥ល្ងាចថ្ងៃទី៣០ មករា កន្លងទៅនេះ មានករណីផ្ទុះអាវុធមួយបានកើតឡើងនៅក្បែរនឹងប៉ុស្តិ៍ចម្កាចេក ឬអូរលែរ ក្នុងតំបន់អូរហ៊ុច ក្បែរព្រំដែនកម្ពុជា-វៀតណាម ក្នុងខេត្តមណ្ឌលគិរី បណ្តាលឲ្យមន្ត្រីប៉េអឹមម្នាក់ និងបរិស្ថានម្នាក់បានស្លាប់នៅហ្នឹងកន្លែង ចំណែកមន្ត្រីអង្គការការពារសត្វព្រៃ WCS ម្នាក់ទៀត បានស្លាប់ពេលដឹកយកមកសង្គ្រោះនៅមន្ទីរពេទ្យបង្អែកស្រុកអូររាំង។
ក្រោយការចាប់ខ្លួន ជនសង្ស័យឈ្មោះ ផល ពេញ ដែលជាជនដៃដល់បានសារភាពថា ការបាញ់សម្លាប់ជនរងគ្រោះទាំង៣នាក់នេះ គឺដោយសារតែខ្លួនមានគំនុំ និងឈ្លោះប្រកែកគ្នា៕
