ខេត្តរតនគិរី ៖ រហូតមកទល់នឹងថ្ងៃទី៣ ខែកុម្ភៈ ឆ្នាំ២០១៨ ឈើជាច្រើនកំណាត់ដែលកម្លាំងកងរាជអាវុធហត្ថនិងមន្ត្រីបរិស្ថានខេត្តរតនគិរីបង្ក្រាប មិនទាន់ត្រូវបានដឹកចេញនៅឡើយទេ ពោលរង់ចាំការដឹកចេញនៅថ្ងៃស្អែក។
ឈើទាំងនោះត្រូវគេដឹងថាជារបស់ក្រុមហ៊ុនដួងស្រួច ដែលដកចេញពីខេត្តព្រះវិហ៊ារ ព្រោះអស់ព្រៃឈើកាប់បំផ្លាញ ទើបលូកដៃឧក្រិដ្ឋមកបំផ្លាញព្រៃឈើនៅខេត្តរតនគីរីបន្តទៀត។
មេបញ្ជាការអាវុធហត្ថខេត្តរតនគិរី ឧត្តមសេនីយ៍ត្រី គឹម រស្មី បានប្រាប់បញ្តាញពត័មានក្នុងស្រុកឲ្យដឹងថា ក្រោយពីទទួលបានព័ត៌មានភ្លាម អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស នាយឧត្តមសេនីយ៍ សៅ សុខា បានដាក់បទបញ្ជាឲ្យកងកម្លាំងខេត្តរតនគិរី អនុវត្តការងារបង្ក្រាបបទល្មើសព្រៃឈើឲ្យខានតែបាន រហូតកម្លាំងរបស់លោក បានបើកប្រតិបត្តិការ ដោយសហការជាមួយមន្ត្រីបរិស្ថាន ឈានដល់ការចាប់ និងរឹបអូសឈើបាន២០១កំណាត់ នាថ្ងៃទី៣ ខែកុម្ភៈ ឆ្នាំ២០១៨ ដែលឈ្មួញបានគរលាក់ទុកក្នុងឃ្លាំង១កន្លែង ស្ថិតនៅក្នុងភូមិសមុទ្រក្រោម ឃុំសេដា ស្រុកលំផាត់ ខេត្តរតនគិរី។
បច្ចុប្បន្ន ឈើសុក្រំ ឈើឈ្លីកជាច្រើនកំណាត់ ត្រូវបានកម្លាំងអាវុធហត្ថ ប្រមូលទុកក្នុងទីតាំងនេះដដែល ហើយបានប្រគល់ឲ្យកម្លាំងបរិស្ថានដែនជម្រកសត្វព្រៃលំផាត់គ្រប់គ្រងបន្ត ដោយមានដាក់កម្លាំងយាមកាមផងដែរ ប៉ុន្តែចំនួនម៉ែត្រគូបនៅមិនទាន់ដឹងនៅឡើយទេ ដោយសារមិនទាន់ធ្វើការវាស់វែង។ លុះព្រឹកថ្ងៃអាទិត្យ ទី៤ ខែកុម្ភៈ ឆ្នាំ២០១៨ ឈើនេះនឹងដឹកយកទៅរក្សាទុកនៅទីស្នាក់ការបរិស្ថាននៅភូមិសាយ៉ស់ ឃុំកាឡែង ស្រុកលំផាត់។
ប្រភពបានបង្ហើបប្រាប់ឲ្យដឹងថា ឈើទាំងអស់នោះរបស់ក្រុមហ៊ុនដួងស្រួច ដែលបាននាំប្រជាពលរដ្ឋឲ្យចូលកាប់ឈើនៅតំបន់ដែនជម្រកសត្វព្រៃលំផាត់ ។
សូមបញ្ជាក់ថា ថ្មីៗមកនេះ មានឃាតកម្មកើតឡើងដែលគេអះអាងថាកើតឡើងពីបទល្មើសព្រៃឈើ បន្ទាប់ពីមន្ត្រីការពារព្រៃឈើ៣នាក់ ត្រូវបានមេប៉ុស្តិ៍ អូរលែ និងបក្សពួក បាញ់សម្លាប់កាលពីថ្ងៃទី៣០ ខែមករា នៅតំបន់អូរហ៊ុច ខេត្តមណ្ឌលគិរី ជាប់ព្រុំដែនកម្ពុជា-វៀតណាម បន្ទាប់មកសមត្ថកិច្ចចម្រុះក៏បានបើកប្រតិបត្តិការបង្ក្រាប ចាប់ខ្លួនឃាតករនិងបក្សពួកជាបន្តបន្ទាប់បញ្ជូនទៅតុលាការវិនិច្ឆ័យទោស៕
