រាជធានីភ្នំពេញ ៖ លោក ស៊ុន ឆាយ ប្រធានគយកំពង់ផែស្វយ័តភ្នំពេញ និងប្រធានគណនេយ្យរងការរិះគន់ថា កំពុងឃុបឃិតគ្នាប្រព្រឹត្ត អំពើពុករលួយជាចំហរ ដោយគ្មានញញើតអ្វីទាំងអស់ នេះបើតាមប្រភពពីមន្ត្រីគយតូចតាចនៅក្នុងកំពង់ផែស្វយ័តភ្នំពេញទម្លាយឲ្យដឹង។ប្រភពខាងលើឲ្យដឹងទៀតថា រាល់ចំណូលទាំងអស់ត្រូវបានលោក ស៊ុន ឆាយ និងប្រធានគណនេយ្យឃុបឃិតគ្នាកេងប្រវ័ញ្ច យកទៅចាយវាយដោយគ្មានតម្លាភាព ហើយគ្មានការបែងចែក ដល់មន្ត្រីគយតូចតាចដើម្បីបានរស់ទាំងអស់គ្នានោះទេ ។
ប្រភពពីមន្ត្រីគយបម្រើការងារនៅអង្គភាពគយនិងរដ្ឋាករកំពង់ផែស្វយ័តភ្នំពេញលើកឡើងថាគឺវាពិតជាមិនធម្មតាទេ សម្រាប់លោក ស៊ុន ឆាយ ប្រធានអង្គភាពគយនិងរដ្ឋាករកំពង់ផែស្វយ័តភ្នំពេញ ដែលអាចរកចំណូលលុយក្រោមតុបានរាប់ម៉ឺនដុល្លារក្នុង១ខែៗ តាមរយៈការបង្កើតការិយាល័យថ្មីៗ ដែលគេហៅថា”ការិយាល័យធិបតេយ្យ” ដោយពួកគេបានប្រព្រឹត្តរឿងអាស្រូវ ជាលក្ខណៈប្រព័ន្ធតែម្តង ជ្រកក្រោមជំនាញ ដោយរាល់ឯកសារប្រតិវេទន៍គយ ឆ្លងកាត់លើទំនិញវិនិយោគនាំចូល ដែលជាពន្ធអាករ បន្ទុករបស់រដ្ឋនោះ។
ក្រុមមន្ត្រីបម្រើការងារនៅអង្គភាពស្វយ័តកំពង់ផែភ្នំពេញបានទម្លាយបន្ត ថា ទំនិញគេចពន្ធជាច្រើនពិសេសគ្រឿងសំណង់និងប្រេងឥន្ធនៈបានចូលមកតាម ច្រកកំពង់ផែស្វយ័តភ្នំពេញនេះយ៉ាងច្រើន ហើយមន្ត្រីគយនៅទីនេះមិន សូវត្រួតពិនិត្យឲ្យបានល្អិតល្អន់ឡើយ ពោលគឺគ្រាន់តែបើកមើលលំៗ និងមើលលើឯកសារតែប៉ុណ្ណោះ។
សកម្មភាពបែបនេះ ត្រូវបានមន្ត្រីទាំងនោះបង្ហើបឲ្យដឹងថា ម្ចាស់ទំនិញទាំងអស់ បានទាក់ទងជាមួយប្រធានគយឈ្មោះ ស៊ុន ឆាយ រួចរាល់អស់ហើយ។ អ៊ីចឹងហើយទើបមានគយចល័តមួយចំនួនចាប់បានទំនិញគេចពន្ធជាបន្តបន្ទាប់ ដែលចេញពីច្រកកំពង់ផែ ស្វយ័តភ្នំពេញនេះតែម្តង។
ចំណែកឯក្រុមអ្នករត់ការឯកសារប្រតិវេទន៍គយ ឲ្យក្រុមហ៊ុនវិនិយោគលើវិស័យសម្ភារៈកាត់ដេរវិញ បានទម្លាយ ប្រាប់អ្នកយកព័ត៌មានថា ក្នុងអង្គភាពគយនិងរដ្ឋាករកំពង់ផែស្វយ័តភ្នំពេញនេះ បានកើតមានភាពមិនប្រក្រតី ជាលក្ខណៈប្រព័ន្ធតែម្តង បើទោះជារដ្ឋាភិបាលបានយកចិត្តទុកដាក់ខ្ពស់មកលើអ្នកវិនិយោគទុន រហូតដល់រាល់ទំនិញរោងចក្រកាត់ដេរ ពន្ធអាករ ជាបន្ទុករបស់រដ្ឋ ប្រយោជន៍ដើម្បី ឲ្យគេមកបណ្តាក់ទុនរកស៊ីនៅកម្ពុជា និងស្រូបយកកម្លាំងពលកម្មក្នុងស្រុកឲ្យពលរដ្ឋខ្មែរមានការងារ បែរជាមន្ត្រីពុករលួយនៅតំបន់ស្វយ័តមួយនេះគោះយកលុយពីពួកគាត់ទៅវិញ។ឯកសារមួយ យ៉ាងតិចក៏ត្រូវចំណាយចាប់ពី៩០ដុល្លារទៅ១០០ដុល្លារ ដែលនេះជាលុយខ្មៅកើតពីការគោះយកឆៅៗតែម្តង តាមភារកិច្ច តាមជំនាញនីមួយៗ ពីមន្ត្រីគយនៅទីនោះ សម្រាប់ទំនិញវិនិយោគនាំចូល។
ជាទម្លាប់ ការរត់ឯកសារ មួយឯកសារ ត្រូវលោក ស៊ុន ឆាយ ប្រធានអង្គភាពគយនិងរដ្ឋាករកំពង់ផែ ស្វយ័តភ្នំពេញ តម្រូវឲ្យបង់លុយដល់ទៅ៦គោលដៅឯណោះ គឺទី១- ត្រូវបង់លុយឲ្យមន្ត្រីគយផ្នែកចុះលេខ ចំនួន៥ដុល្លារ ទី២-ខាងគណនេយ្យ ចំនួន១០ដុល្លារ ទី៣- ក្រុមត្រួតពិនិត្យ មួយកុងតឺន័រ១០ដុល្លារ ទី៤- ក្រុមគយចាំយកលុយនៅកន្លែងគណនេយ្យ សម្រាប់រាប់ក្បាលកុងតឺន័រទំហំ៤០ហ្វីតចំនួន៥០ដុល្លារ ទំហំ២០ហ្វីត៤០ដុល្លារ ទី៥- បង់ឲ្យអនុប្រធាន មួយឯកសារក្នុងម្នាក់ ចំនួន៥ដុល្លារ និងទី៦- បង់ឲ្យលោក ស៊ុន ឆាយ ប្រធានអង្គភាពគយនិងរដ្ឋាករកំពង់ផែស្វយ័តភ្នំពេញ ដោយមួយឯកសារ១០ដុល្លារ។
ជាធម្មតា ឯកសារចុះប្រតិវេទន៍គយ ត្រូវឆ្លងកាត់គយនិងបង់លុយក្រោមតុបែបនេះក្នុងមួយថ្ងៃមានចាប់ពី៣០ទៅ ៤០ឯកសារ សួរថា តើពួកគាត់គោះ ពីក្រុមហ៊ុនវិនិយោគ បានប៉ុន្មានពាន់ដុល្លារក្នុងមួយថ្ងៃ ? ម្យ៉ាងទៀត ក្នុងមួយឯកសារចុះលេខម្តងៗ មិនមែនតិចកុងតឺន័រឡើយ គឺយ៉ាងតិចចាប់ពី៥កុងតឺន័រ ទៅ១៥កុងតឺន័រ ហើយមួយកុងតឺន័របង់លុយក្រោមតុចាប់ពី៤០ដុល្លារ ទៅ៥០ដុល្លារ តើមួយថ្ងៃៗ ឃុបឃិតពុករលួយជាលក្ខណៈប្រព័ន្ធបែបនេះ បានប៉ុន្មានពាន់ដុល្លារ? គេសង្ស័យថា ប្រាក់នេះមិនបានបង់ចូលរដ្ឋ ខណៈជាទម្លាប់ ក្នុងរយៈពេល១សប្តាហ៍ឬពីរសប្តាហ៍ ត្រូវគេទម្លាយមកថា លុយកេសខ្មៅនេះ ក៏ត្រូវបានបែងចែកគ្នាម្តង តិចច្រើនទៅតាមឋានានុក្រម។
មានប្រភពខ្លះសង្ស័យថា ការដែលលោក ស៊ុនឆាយ ហ៊ានធ្វើអ្វីៗតាមអំពើចិត្ត អាងមានរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុម្នាក់ឈ្មោះ ចិត្រ ដែលជាខ្នងបង្អែកដ៏រឹងមាំចាំជួយការពារ គ្រប់ពេលវេលា។ មជ្ឈដ្ឋាននានាបានជំរុញឲ្យលោក គុណ ញឹម អគ្គនាយកនៃអគ្គនាយកដ្ឋាន គយនិងរដ្ឋាករកម្ពុជា លោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងហិរញ្ញវត្ថុ គួរពិនិត្យមើលបញ្ហាខាងលើនេះឡើងវិញ ព្រោះអី លោក ស៊ុន ឆាយ និងបក្ខពួក កំពុងតែឃុបឃិតគ្នាប្រព្រឹត្តអំពើពុករលួយយ៉ាងរលូន។
ករណីខាងលើ មិនអាចសុំការបំភ្លឺពីលោក ស៊ុន ឆាយ បាននៅឡើយទេ ព្រោះពុំមានលេខទូរសព្ទ័ តែរង់ចាំការបំភ្លឺពីភាគីពាក់ពន្ធ័ជានិច្ច៕
