មណ្ឌលគិរី ៖ មានករណីបាញ់ប្រហារ មន្ត្រីបរិស្ថាន និងមន្ត្រីអាវុធហត្ថ ដែលតាមប្រភពជាផ្លូវការថាមានមនុស្ស៣នាក់បានស្លាប់ក្នុងហេតុការណ៏ខាងលើ ករណីនេះកើតនៅចំណុចស្ថិតនៅតាមក្រវ៉ាត់ព្រំដែន ក្នុងភូមិសាស្រ្កអូររាំង ខេត្តមណ្ឌលគីរី នៅល្ងាចថ្ងៃទី៣០ខែមករាឆ្នាំ២០១៨នេះ។មេបញ្ជាការអាវុធហត្ថខេត្តមណ្ឌលគិរី បញ្ជាក់ប្រាប់ថាពិតជាមានករណីនេះប្រាកដមែន ប៉ុន្តែលោកប្រាប់ថា ពត៌មានជាក់លាក់យ៉ាងណានោះនៅរង់ចាំក្រុមការងារចុះដល់កន្លែងកើតហេតុសិន តែលោកបានបញ្ជាក់ថា ក្នុងចំណោមជនរងគ្រោះទាំងនោះមានម្នាក់ជាមន្ត្រីអាវុធហត្ថលើផ្ទៃប្រទេស ពត៌មានច្បាស់ស្ថិតនៅចំណុច ប៉ុស៌អូរដាក់ឡេ គ្រប់គ្រងដោយលោក ផល ពេញ ជាមេប៉ុស្តិ។
សូមបញ្ជាក់ថា ការបាញ់ប្រហារនេះបានកើតឡើងនៅចំណុចប៉ុស្ដិ៍អូររលែ ក្នុងភូមិសាស្ដ្រភូមិពូហ្យាមឃុំសែនមនោរម្យ ស្រុកអូររាំង ខេត្តមណ្ឌលគិរី នៅចន្លោះម៉ោង៤ ទៅម៉ោង៥ល្ងាច ថ្ងៃទី៣០ ខែមករា ឆ្នាំ២០១៨ បានបណ្ដាលឲ្យស្លាប់មនុស្ស៣នាក់រួមមាន ៖ មន្ដ្រីអាវុធហត្ថលើផ្ទៃប្រទេសម្នាក់, មន្ដ្រីឧទ្យានុរក្ស នៃមន្ទីរបរិស្ថានខេត្តមណ្ឌលគិរីម្នាក់ និងបុគ្គលិកអង្គការសមាគមអភិរក្សសត្វព្រៃ Worldlife Conservation Society (WCS)ម្នាក់។
ការបាញ់ប្រហារនេះ ជាជំហានដំបូងគេសង្ស័យទៅលើនាយនគរបាលប៉ុស្តិ៍ព្រំដែនអូររលែ គឺលោក ផល ពេញ បូករួមទាំងឈ្មោះ កើត វេហា និងឈ្មោះ ងួរ ជាមន្ដ្រីយោធាការពារព្រំដែននៅតំបន់នោះ ក្រោយពេលដែលបានឈ្លោះប្រកែកជាមួយក្រុមជនរងគ្រោះ រឿងបទល្មើសព្រៃឈើ។ យ៉ាងណាក៏ដោយ នៅពេលនេះ គណៈកមា្មធិការទប់ស្កាត់និងបង្ក្រាបបទល្មើសព្រៃឈើថ្នាក់ជាតិ ក្រោមការបញ្ជាផ្ទាល់ពីនាយឧត្តមសេនីយ៍ សៅ សុខា មេបញ្ជាការអាវុធហត្ថលើផ្ទៃប្រទេស និងជាប្រធានគណៈកម្មាធិការ បាននិងកំពុងបើកការស្រាវជ្រាវរកមូលហេតុ និងជនដែលពាក់ព័ន្ធនៃការផ្ទុះអាវុធបាញ់សម្លាប់មនុស្សយ៉ាងដូច្នេះ ហើយមូលហេតុចម្បងដែលមជ្ឈដ្ឋាននានាៗដាក់ការសង្ស័យជារួមនោះ គឺពាក់ព័ន្ធទៅនឹងបទល្មើសព្រៃឈើជាក់ជាមិនខានឡើយ។
លោកឧត្តមសេនីយ៍ត្រី អេង ហ៊ី អ្នកនាំពាក្យអាវុធហត្ថលើផ្ទៃប្រទេស បានថ្លែងប្រាប់បណ្តាញសារព័ត៌មាន ក្នុងស្រុកថា គិតត្រឹមថ្ងៃទី៣១ ខែមករា ឆ្នាំ២០១៨នេះ គណៈកមា្មធិការទប់ស្កាត់និងបង្ក្រាបបទល្មើសព្រៃឈើថ្នាក់ជាតិ ក្រោមការបញ្ជាផ្ទាល់ពីនាយឧត្តមសេនីយ៍ សៅ សុខា មេបញ្ជាការអាវុធហត្ថលើផ្ទៃប្រទេស និងជាប្រធានគណៈកម្មាធិការ បានធ្វើដំណើរចុះទៅកាន់ទីកន្លែងកើតហេតុ ដើម្បីបើកការស្រាវជ្រាវរកមូលហេតុ និងជនដែលពាក់ព័ន្ធនៃការផ្ទុះអាវុធ រហូតស្លាប់មនុស្សយ៉ាងដូច្នេះ ប៉ុន្ដែលទ្ធផលយ៉ាងណានោះ មិនទាន់ត្រូវបានបញ្ជាក់ឲ្យដឹងនៅឡើយទេ។
ចំណែកមូលហេតុខ្លះដែលនាំឲ្យមានការផ្ទុះអាវុធ រហូតស្លាប់៣នាក់ គឺអាចពាក់ព័ន្ធទៅនឹងបទល្មើសព្រៃឈើ ហើយមានសមត្ថកិច្ចមួយចំនួន ស្ថិតនៅក្នុងសំណុំរឿងនេះនិងកំពុងត្រូវបានស៊ើបអង្កេត។
រីឯអ្នកភូមិម្នាក់ដែលរត់រួចខ្លួនទាំងព្រលឹងចុងសក់ នៅក្នុងការបាញ់ប្រហារខាងលើនេះក្នុងចំណោមជនរងគ្រោះ៣នាក់ ដែលបានស្លាប់ ត្រូវបានសមត្ថកិច្ចហៅទៅសួរនាំ នៅស្នងការដ្ឋាននគរបាលខេត្ត តែមិនទាន់ដឹងលទ្ធផលនៅឡើយទេ៕
